काय आहे प्रकरण?
हा सर्व प्रकार पेढीतील सीसीटीव्हीत कैद झाला असून, दरोडेखोरांनी चेहऱ्यावर रुमाल बांधल्याचे त्यात दिसून येते.
या प्रकरणी सराफी पेढीचे मालक शफी शेख (वय ५५, रा. हडपसर) यांनी तक्रार दिली आहे. त्यावरून वानवडी पोलिस ठाण्यात पाच दरोड्यांचा गुन्हा दाखल करण्यात आला आहे. सर्व दरोडेखोर अंदाजे २० ते २५ वयोगटांतील होते. दरोडेखोरांकडे पिस्तूल, लोखंडी रॉड आणि एक स्प्रे होता.
शहर पोलिसांच्या ‘परिमंडळ पाच’चे उपायुक्त आर. राजा यांनी दिलेल्या माहितीनुसार, महंमदवाडी रस्त्यावरील वाडकर मळा येथे बीजीएस ज्वेलर्स या नावाची सराफी पेढी आहे. दुकानात शनिवारी सव्वाबारा वाजण्याच्या सुमारास पाच अज्ञात दरोडेखोर दुचाकीवरून आले. त्यांनी दुकानातील कामगारांना पिस्तूल आणि अन्य हत्यारे दाखवून घाबरवले. दरोडेखरांनी तक्रारदाराला लाथाबुक्क्यांनी मारहाण करून घाबरवले. त्यानंतर सोन्याचे दागिने घेण्यास सुरुवात केली. तेव्हा दुकानाशेजारील व्यावसायिकांनी ‘चोर चोर’ म्हणून आरडाओरडा केला. त्यामुळे दरोडेखोरांनी अवघ्या तीन ते चार मिनिटांत दागिने घेऊन दुकानातून पळ काढला. दुचाकीवरून दरोडेखोर सय्यदनगरच्या दिशेने गेले.
पथके रवाना; नाकाबंदी करून तपासणी
या प्रकारामुळे पेढीतील घाबरलेल्या कामगारांनी पोलिसांना फोन केला. वानवडी पोलिसांसह पोलिस आयुक्तालयातील वरिष्ठ अधिकाऱ्यांनी घटनास्थळी धाव घेतली. गुन्हे शाखेचे अतिरिक्त आयुक्त शैलेश बलकवडे, अतिरिक्त आयुक्त मनोज पाटील, उपायुक्त (गुन्हे) अमोल झेंडे, उपायुक्त आर राजा, गुन्हे शाखेचे सहायक पोलिस आयुक्त सतीश गोवेकर, निरीक्षक अजय वाघमारे आदींनी घटनास्थळी पाहणी केली. त्यानंतर वरिष्ठ अधिकाऱ्यांनी दरोडेखोरांचा माग काढण्यासाठी तपास पथकाने वेगवेगळ्या भागांत रवाना केली. चोरटे दुचाकीवरून पसार झाल्याचे उघड झाल्यानंतर पोलिसांनी हडपसर, वानवडी, कोंढवा परिसरांत नाकाबंदी करून संशयित वाहनांची तपासणी सुरू केली. वानवडी पोलिसांसह गुन्हे शाखेकडून समांतर तपास करण्यात येत आहे.
दरोड्याच्या घटनेची माहिती मिळाल्यानंतर तातडीने तपास पथके दरोडेखोरांच्या मागावर रवाना केली आहेत. शहरात ठिकठिकाणी नाकाबंदी करून तपासणी करण्यात येत आहे.- आर. राजा, उपायुक्त, परिमंडळ पाच