मुंबईतील एमआयएमचा एकमेव उमेदवार आणि शहरातील सर्वाधिक उमेदवार अशी ओळख मुंबई उत्तर मध्य मतदारसंघाची आहे. मात्र खरी लढत महायुतीचे उज्ज्वल निकम आणि महाविकास आघाडीच्या वर्षा गायकवाड यांच्यात आहे. उमेदवारी घोषित झाल्यापासून दोन्ही उमेदवारांसह त्यांच्या पक्षांतील आमदार, प्रचार पथकाने दिवस-रात्र मेहनत घेतली आहे. ‘मॉर्निंग वॉक’पासून मतदारांशी संवाद, पदयात्रा, भेटीगाठी, वेगवेगळ्या संघटनांशी बैठका सायंकाळी उशिरापर्यंत पदयात्रा, कॉर्नर सभा आशा वेगवेगळ्या माध्यमांतून मतदारांपर्यंत ते पोहोचले. युवा मोर्चा, महिला आघाडी अशा पक्षांच्या सर्वच घटकांनी आपला उमेदवार खासदारपदी निवडून यावा, यासाठी गेले १५ दिवस मेहनत केली.
जाहीर प्रचाराच्या अखेरच्या दिवशी निकम यांनी अधिकाधिक वेळ मतदारांसोबत घालवण्यासाठी प्रभातफेरी, केंद्रीय मंत्री रामदास आठवले यांच्या उपस्थितीत जनसंवाद, विलेपार्ले येथे पदयात्रा वांद्रे पूर्वेकडील संत ज्ञानेश्वरनगरमधील मतदारांच्या गाठीभेटी घेतल्या. त्यांच्या प्रचाराची सांगता करण्यासाठी कुर्ला पश्चिमेकडे थेट उत्तर प्रदेशचे मुख्यमंत्री योगी आदित्यनाथ उपस्थित होते.
पंतप्रधानपदी तिसऱ्यांदा नरेंद मोदी, राष्ट्रहित, विकसित भारत, आर्थिक महासत्ता, स्वातंत्र्याला १०० वर्षे होताना २०४७मधील भारत असे मुद्दे महायुतीच्या अजेंड्यावर असल्याचे जाहीर सभांतून स्पष्ट झाले. काँग्रेस नेत्यांची २६/११ वादग्रत वक्तव्ये, दहशतवादी हल्ला समर्थन अशा विरोधकांच्या टीकेला जशास तसे उत्तर महायुतीच्या सर्वच नेत्यांनी दिले. पंतप्रधान नरेंद्र मोदी आणि मुख्यमंत्री योगी आदित्यनाथ यांच्या मुंबई दौऱ्याने प्रचार एकहाती नेला.
महाविकास आघाडीच्या वर्षा गायकवाड यांनी प्रचाराची सांगता बाइक रोड शो आणि जनसंवादाने केली. रंगशारदा येथून सुरू झालेल्या बाइक रॅलीत शेकडो दुचाकीस्वारांनी सहभाग घेतला. बडी मशिद एस. व्ही. रोड, मिलन सबवे, नानावटी रुग्णालय, कुर्ला आगार, साकीनाका, कमानी, एससीएलआर मार्गे चुनाभट्टी गाठत तक्षशीला नगरमध्ये रोड शो आटोपला. या ठिकाणी छोटेखानी सभा भरवली.
गर्दीमुळे कुणी दरवाज्यातून बाहेर, कुणी खांबाला धडकलं; रेल्वेतून पडून तिघांचा मृत्यू; दिवा ते उल्हासनगर दरम्यान घटना
महाविकास आघाडीने पंतप्रधानपदाचा दावेदार जाहीर केलेला नाही. महागाई, प्रकल्प-संस्था, सरकारने पळवून नेली, आंतरराष्ट्रीय नावलौकिक असलेल्या शहराची ओळख पुसली, मुंबईवर सातत्याने अन्याय, महिला सुरक्षा, फेरीवाल्यांचे प्रश्न, प्रदूषण, रस्त्यांचे प्रश्न, केंद्र व राज्य सरकारमध्ये असमन्वय असे मुद्दे काँग्रेसच्या अजेंड्यावर होते. सोनिया गांधी, राहुल गांधी, प्रियांका या मोठ्या नेत्यांनी मुंबईकडे पाठ फिरवली. मल्लिकार्जुन खर्गे हेच काँग्रेसचे मोठे नेते मुंबईत दाखल झाले होते.
मतदारांना केंद्रापर्यंत आणण्याचे काम
महायुतीचे उमेदवार उज्ज्वल निकम निवडून येण्यासाठी भाजप, शिवसेना, मनसे, रिपाइं आणि अन्य पक्ष यांच्या सर्व कार्यकर्त्यांनी मेहनती घेतली. नेते-पदाधिकाऱ्यांनी योग्य मार्गदर्शन केले प्रसंगी सक्रिय सहभागही नोंदवला. जाहीर प्रचार संपला आता मतदारांना केंद्रापर्यंत आणण्याचे काम सुरू झाले आहे. पन्ना प्रमुखांना प्रत्येक मतदार वाटून देण्यात आला आहे. त्यांना मतदानाची चिट्ठी देण्यापासून केंद्रापर्यंत पोहोचवण्याच्या जबाबदारीचे वाटप झाले आहे. यामुळे उत्तर मध्यमधून निकम यांचा विजय निश्चित आहे, अशी माहिती भाजपचे आमदार पराग आळवणी यांनी दिली.