लोकसभा निवडणुकीच्या प्रचारादरम्यान पंतप्रधान नरेंद्र मोदी हे सातत्याने शिवसेनेच्या ठाकरे गटाचे प्रमुख उद्धव ठाकरे यांच्यावर टीका करत आहेत. मात्र अलीकडेच एका वृत्तवाहिनीला दिलेल्या मुलाखतीत उद्धव ठाकरेंविषयी मवाळ भूमिका घेतल्याचे दिसले. उद्धव ठाकरे हे बाळासाहेब ठाकरे यांचे पुत्र आहेत आणि माझे त्यांच्याशी खूप चांगले संबंध आहेत. ते आजारी असताना मी नेहमी त्यांना फोन करायचो. त्यांच्या प्रकृतीची अधूनमधून विचारपूस करायचो. उद्धव ठाकरे हे काही माझे शत्रू नाहीत. उद्या त्यांच्या अडचणीच्या काळात त्यांना सर्वात आधी मदत करणारा मीच असेन. परंतु, हे सगळं कुटुंब म्हणून. आमचे राजकीय मार्ग मात्र आता वेगळे आहेत, असे ते म्हणाले होते.
उद्धव ठाकरे यांनी यावर एका मुलाखतीत प्रतिक्रिया दिली आहे. उद्धव ठाकरे म्हणाले, नरेंद्र मोदींचे हेच वक्तव्य त्यांना पुन्हा एकदा दाखवायला हवे, ऐकवायला हवे. आता ते मला नकली संतान म्हणत आहेत. त्यांची ही अशी वक्तव्ये ऐकून मी त्यांना आणि या सरकारला गझनी सरकार म्हणतो. आधी काय म्हटले ते नंतर त्यांना आठवण नाही. गेल्या आठवड्यात तेलंगणमध्ये ते मला नकली संतान म्हणाले. आता माझा आणि तेलंगणचा काय संबंध? मला वाटते मोदींना जो कोणी भाषणे लिहून देतो त्याला त्याचे मानधन मिळालेले नाही. कदाचित तो संपावर गेला असेल. त्यामुळे मोदी भाषणांमध्ये अशी वक्तव्ये करत आहेत. मोदी हे बऱ्याचदा लिहून आणलेली भाषणे टेलिप्रॉम्प्टरच्या साह्याने वाचून दाखवतात. कदाचित त्यांच्यासमोर टेलिप्रॉम्प्टर नसेल म्हणून त्यांनी असे वक्तव्य केले असावे. उद्या नरेंद्र मोदींना काही झाले तर मीदेखील त्यांच्यासाठी धावून जाईन. त्यांच्या अडचणीच्या काळात त्यांच्यामागे उभा राहीन. कारण हीच माणुसकी आहे आणि हेच आमचे हिंदुत्व आहे असे उद्धव ठाकरे म्हणाले.
Nashik News : दुपारी महायुतीच्या सभेत, रात्री ठाकरेंच्या मंचावर; सीमाताईंनी बुचकळ्यात पाडलं, अखेर कारण उलगडलंRead Latest Maharashtra News Updates And Marathi News
३०२चे दोन झाले तर काय करतील?
उद्धव ठाकरे पुढे म्हणाले की, मला चिंता आहे की, ४ जूनला यांचे सरकार जातेय. त्या दिवशी अर्धा भाजप तिथेच फुटेल. शिवाय, पंतप्रधानपद गेलेले असेल. त्यांनी ७५ वर्षांची अट टाकलेली आहे. त्यामुळे दोन वर्षांनी मोदी निवृत्त होणार. मग भाजपचे काय होईल? एक काळ असा होता, की अटलबिहारी वाजपेयींचा पराभव झाला होता. भाजपचे दोनच खासदार होते. त्यामुळे ३०२ वरून दोन झाले तर काय करतील भाजपवाले, यांना कुठे विलीन व्हायला पक्षही राहणार नाही. यांना कोणीही घेणार नाही, असा दावाही उद्धव यांनी केला.