सुट्ट्यांमुळे बसला गर्दी
पुणे व पिंपरी-चिंचवड शहरांत स्वारगेट, शिवाजीनगर, पुणे स्टेशन, वल्लभनगर अशी महत्त्वाची आगारे आहेत. या ठिकाणांहून राज्याच्या कानाकोपऱ्यात एसटी बस धावतात. सध्या उन्हाळ्याच्या सुट्ट्या सुरू असून, गावी व पर्यटनासाठी जाणाऱ्यांची संख्या मोठी आहे. त्यामुळे एसटी बसला मोठी गर्दी आहे.
बसला रात्री उशीर
नागरिक त्यांच्या वेळेनुसार लांब पल्ल्यांच्या बसचे बुकिंग करतात. विशेषत: रात्रीच्या बसचे बुकिंग करण्यावर जास्त भर आहे. मात्र, रात्रीच्या अनेक बस वेळेत आगारात येत नसल्याचे आढळत आहे. त्यामुळे प्रवाशांना आगारात ताटकळत थांबावे लागत असल्याच्या तक्रारी येत आहेत; पण याकडे एसटी प्रशासनाकडून दुर्लक्ष केले जात असल्याची तक्रार आहे.
ज्येष्ठ नागरिक, महिलांचे हाल
एसटी महामंडळाकडून ज्येष्ठ नागरिकांना व महिलांना प्रवास करताना तिकिटामध्ये सवलत आहे. त्यामुळे महिला व ज्येष्ठ नागरिकांची एसटीला मोठी गर्दी आहे. महिलांसोबत लहान मुलेदेखील एसटीतून प्रवास करतात. मात्र, एसटी बस वेळेत धावत नसल्यामुळे ज्येष्ठ नागरिक, महिला व लहान मुलांना स्थानकांमध्ये ताटकळत थांबावे लागते. एसटी स्थानकांत बसण्यासाठी पुरेशी व्यवस्था नसल्यामुळे ज्येष्ठांचे हाल होत आहेत.
चौकशी कक्ष माहितीबाबत अनभिज्ञ
‘बसला उशीर का होत आहे, बस कधी येणार आहे,’ याबाबत आगारातील चौकशी कक्षाकडे विचारणा केल्यास प्रवाशांना व्यवस्थित माहिती दिली जात नाही. ‘बस लवकर येईल,’ एवढेच सांगितले जाते. पुनपुन्हा विचारणा केल्यास ‘बस कधी येणार हे आम्हालाच माहिती नाही,’ असे उत्तर दिले जाते. त्यामुळे प्रवाशांनी विचारणा कोणाकडे करायची, असा प्रश्न निर्माण झाला आहे.
——-
शहरातील वाहतूक कोंडीचा फटका
पुण्यात बाहेरील आगारांतून येणाऱ्या बस पुण्याच्या वेशीपर्यंत वेळेवर येतात. मात्र, पुण्यात शिरल्यानंतर काही किलोमीटर अंतरासाठी बसला एक ते दीड तास लागतो. त्यामुळे त्यांना पोहचण्यास उशीर होते. त्यामुळे त्या सुटण्यासदेखील उशीर होत असल्याचे दिसत आहे. वाहतूक कोंडीमुळे एसटीला फटका बसत असल्याचे एसटी महामंडळाच्या अधिकाऱ्यांनी सांगितले.
——-
एसटीचे वेळापत्रक बिघडले आहे. शिवाजीनगर स्थानकावरून रात्री पावणेनऊला सुटणारी गाडी रात्री साडेबारा वाजता स्वारगेट स्थानकावर आली. त्यात गाडी नेहमीच्या फलाटाऐवजी दुसरीकडेच लागली. गाडीला होत असलेला उशीर आणि फलाटाची बदललेली जागा याबाबत कोणतीही माहिती देण्यात आली नाही.
– एक प्रवासी
———
पुण्यात असलेल्या वाहतूक कोंडीचा फटका बाहेरून येणाऱ्या आगारांच्या गाड्यांना बसला होता. त्यामुळे बसला उशीर होऊ शकतो. पुणे आगारांच्या बसला उशीर होत असल्याचे दिसल्यास त्यांमध्ये नक्कीच सुधारणा केली जाईल.
– प्रमोद नेहूल, विभाग नियंत्रक, पुणे विभाग