‘मला मुलाला भेटण्याचा हक्क आहे; परंतु प्रिया हेतुपुरस्सर मुलाची भेट घेण्यापासून आपल्याला रोखत आहे. माझे आई-वडील २०१७पासून नातवाला भेटू शकलेले नाहीत. ते त्याला पाहण्यासाठी उत्सुक आहेत. त्यामुळे मुलाचा तात्पुरता ताबा देण्यात यावा,’ अशी मागणी राजने या अर्जात केली.
प्रियाने या मागणीला विरोध केला. ‘राजला मद्याचे व्यसन असून, त्याच्या अंमलाखाली त्याने मुलासमोर मला मारहाण केली आहे. त्यामुळे मुलाच्या मनात वडिलांविषयी प्रचंड दहशत असून, त्याच्या घरी मुलाची काळजी घेणारे कोणीही नाही. मीच मुलाची जबाबदारी घेतली असून, त्याचा ताबा अचानक नवऱ्याला देणे वेदनादायी आहे,’ असे प्रियाचे म्हणणे होते.
न्यायालयाने दोन्ही बाजू ऐकून घेतल्या. ‘राज समीरचे वडील असून, त्यांना आपल्या मुलाला भेटण्याचा समान हक्क आहे,’ असे नमूद करून न्यायालयाने १५ दिवसांसाठी समीरचा ताबा वडिलांकडे दिला. ‘या कालावधीत राज आणि त्याचे कुटुंबीय समीरशी आईबद्दल किंवा न्यायालयात दाखल खटल्याबद्दल वाच्यता करणार नाहीत, आई मुलाशी टेलिफोन किंवा व्हिडिओ कॉलवर बोलू शकते; तसेच हा कालावधी संपल्यावर समीरचा ताबा पुन्हा आईकडे देण्यात यावा,’ अशा अटीही न्यायालयाने घातल्या आहेत.
उन्हाळ्याच्या सुट्टीत ताब्यांचे दावे
दर वर्षी मार्च, एप्रिल आणि मे महिन्याच्या कालावधीत शाळांना उन्हाळ्याच्या सुट्ट्या असल्याने मुलांचा ताबा मिळावा म्हणून कौटुंबिक न्यायालयात दावे दाखल होण्याचे प्रमाण वाढते. या दाव्यांची सुनावणी प्रामुख्याने घेतली जाते.
अपत्याला आई आणि वडील या दोघांचेही प्रेम आणि माया मिळणे आवश्यक असते. आजी-आजोबांनाही नातवाला पाहायचे असते. मात्र, पती-पत्नीच्या वादात त्यांची फरफट होते. मुलांवर आई-वडील दोघांचाही समान अधिकार असतो. तो अधिकार कुणीही हिरावून घेऊ शकत नाही, हे न्यायालयाने निकालातून अधोरेखित केले आहे.
– ॲड. गायत्री कांबळे, पतीच्या वकील