प्रतिनिधी, पुणे : राज्य माध्यमिक आणि उच्च माध्यमिक शिक्षण मंडळाने दहावीच्या परीक्षा शुल्कामध्ये १० टक्के वाढ केली असून, नवे शुल्क आगामी पुरवणी परीक्षेपासून लागू करण्यात आले आहे. तंत्र विषयाला जादा ~ १०० सुधारित शुल्कानुसार नियमित पद्धतीने परीक्षेला बसणाऱ्या विद्यार्थ्याला ५४० रुपये आणि तंत्र विषय घेणाऱ्या विद्यार्थ्याला प्रात्यक्षिक परीक्षेचे जादाचे १०० रुपये भरावे लागतील, असे राज्य मंडळाकडून सांगण्यात आले आहे.वाढता स्टेशनरी खर्च लक्षात घेऊन राज्य मंडळाने परीक्षा शुल्क वाढीचा प्रस्ताव शिक्षण विभागाला पाठवला होता. त्यानुसार शिक्षण विभागाने १० टक्के शुल्कवाढीला परवानगी दिली. राज्य मंडळाच्या सचिव अनुराधा ओक यांनी सुधारित शुल्काबाबतचे परिपत्रक प्रसिद्ध केले आहे. त्याचप्रमाणे खासगी पद्धतीने परीक्षेला बसणाऱ्या विद्यार्थ्याला नावनोंदणी, माहिती पुस्तिका; तसेच परीक्षा शुल्क असे मिळून एक हजार ८८० रुपये भरावे लागणार आहेत.
पुनर्परीक्षार्थ्यांना ~ ५२० पुनर्परीक्षार्थ्यांना ५२० रुपये परीक्षा शुल्क भरावे लागेल, असे परिपत्रकात सांगण्यात आले आहे. श्रेणीसुधार योजनेंतर्गत परीक्षा देणाऱ्या विद्यार्थ्याला ९८० रुपये भरावे लागतील. हे सुधारित शुल्क आगामी जुलैची पुरवणी परीक्षा: तसेच फेब्रुवारी-मार्च २०२५च्या नियमित परीक्षेसाठी आकारण्यात येईल, असे परिपत्रकात नमूद करण्यात आले आहे.