पुण्यातील बड्या बांधकाम व्यावसायिकाच्या अल्पवयीन मुलाच्या भरधाव कारने दुचाकीला धडक दिल्याने मृत्युमुखी पडलेल्या अनिस अवधिया आणि अश्विनी कोस्टा यांच्यावर सोमवारी त्यांच्या मूळगावी अंत्यसंस्कार करण्यात आले. अश्विनी कोस्टा ही मध्य प्रदेशातील जबलपूरची, तर अनिस हा उमरिया जिल्ह्यातील बिरसिंहपूर पाली गावाचा रहिवासी होता.
‘राज्यघटना आणि कायद्याच्या आधारे दोषींवर कारवाई व्हावी. अल्पवयीन मुलांना वाहन चालविण्यास देणे चुकीचे आहे. आमची मुले मोठी झाल्याशिवाय आम्ही त्यांना वाहन चालवायला दिले नाही,’ असे सुरेश कोस्टा म्हणाले. दुसरीकडे अनीसच्या अपघाती मृत्यूचे दु:ख त्याची आई आणि आजीला सहन होत नव्हते. ‘अनीस महिनाभरापूर्वी घरी आला होता. त्याचे लवकर लग्न करून घरी सून आणण्याचे स्वप्न आई पाहायची; परंतु आता सारा आनंद हिरावला गेला,’ असे त्याच्या कुटुंबियांनी सांगितले.
कल्याणीनगर येथील प्राणांतिक अपघातप्रकरणी अल्पवयीन कारचालकावर दाखल केलेल्या गुन्ह्यात आता दारू पिऊन गाडी चालविल्याचे कलम समाविष्ट करण्यात आले आहे. या प्रकरणी येरवडा पोलिस ठाण्यात गुन्हा दाखल आहे. त्यात पोलिसांनी भारतीय दंड संहिता कलम ३०४, ३०४ (अ), २७९, ३३७, ३३८, ४२७ आणि मोटार वाहन अधिनियम १९८८ च्या १८४, ११९ आणि १७७ नुसार गुन्हा दाखल केला होता. त्यात आता पोलिसांनी कलमवाढ करून मोटार वाहन अधिनियम १९८८ च्या १८५ची कलमवाढ केली आहे.
दरम्यान, अपघातातील अल्पवयीन मुलांना मद्य पुरविल्याप्रकरणी हॉटेल ट्रिलियन सिक्युरिटी प्रायव्हेट लिमिटेड (कोझी) आणि पंचशील इन्फ्रास्ट्रक्चर (ओक वुड) मॅरियट सूट- ब्लॅक या बार आणि पबला राज्य उत्पादन शुल्क विभागाने मंगळवारी टाळे लावले. जिल्हाधिकारी डॉ. सुहास दिवसे यांच्या आदेशानंतर ही कारवाई करण्यात आली. पुढील आदेशापर्यंत हे पब बंद राहणार असल्याचे उत्पादन शुल्क विभागाकडून स्पष्ट करण्यात आले आहे.
तीन रूम बुक केल्या पण वेगळ्याच ठिकाणी राहिला, पोलिसांना टीप मिळाली आणि अग्रवालचा गेम झाला…!Read Latest Maharashtra News Updates And Marathi News
कल्याणीनगर येथील अपघातातील आरोपी आणि त्याचे मित्र या दोन बारमधून पार्टी करून बाहेर पडल्याचे स्पष्ट झाल्याने अल्पवयीन मुलांना मद्य पुरविणे, तसेच वेळेची मर्यादा न पाळणे यामुळे हे बार चर्चेत आले आहेत. कोझी आणि ब्लॅक या दोन्ही पबचालकांवर सोमवारी गुन्हा दाखल करण्यात आला होता. या दोन्ही पबमध्ये मद्यविक्रीबाबतच्या नोंदी ठेवण्यात आल्या नव्हत्या. त्यामुळे हे दोन्ही पब बंद करण्याच्या कारवाईचा प्रस्ताव राज्य उत्पादन शुल्क विभागाकडून जिल्हाधिकारी डॉ. दिवसे यांच्याकडे मंगळवारी सादर करण्यात आला. हा प्रस्ताव तातडीने मान्य करून दिवसे यांनी हे पब बंद करण्याचा आदेश दिला. त्यानंतर पबला टाळे लावण्यात आले.