मुंबईत लोकसभा निवडणुकीच्या पाचव्या टप्प्यात सोमवार, २० मे रोजी मतदान होणार आहे. उमेदवारांच्या हातात जेमतेम १५ दिवस आहेत. या कालावधीत संपूर्ण मतदारसंघ पिंजून काढण्यासाठी पदयात्रा, मेळावे, बैठका, रॅली यांचे नियोजन करताना उमेदवार घामाघूम होत आहेत. ज्यांच्यासाठी उमेदवारांचा हा अट्टाहास सुरू आहे त्या मतदारराजाची मात्र गावाकडे रिघ लागली आहे.
मुंबई-कोकण मार्गावरील मडगाव वंदे भारत, जनशताब्दी, तेजस अशा वेगवान गाड्यांच्या सर्व श्रेणींतील आसने आरक्षित झाली आहेत. नेत्रावती, कोकणकन्या, मांडवी, मत्स्यगंधा या गाड्याही पूर्ण आरक्षित असून, सातही प्रमुख रेल्वेगाड्यांच्या सरासरी प्रतीक्षायादीने शंभरी पार केली आहे.
रेल्वेगाड्यांना गर्दी असल्याने प्रवाशांची पावले खासगी बसकडे वळू लागली आहे. खासगी गाड्यांचे १८ ते २० मेदरम्यानचे आरक्षण पूर्ण झाले आहे. खासगी बसमध्ये शयनयान श्रेणीच्या बसला मागणी आहे. मे महिन्याच्या सुरुवातीपासूनच आरक्षण पूर्ण झाले आहे, असे दादरमधील बस चालक निलेश कांबळे याने सांगितले. दरम्यान मुंबई ते सिंधुदुर्ग ऑनलाइन बस आरक्षणाचे १८ ते २० मेदरम्यानचे तिकीट दर २,००० ते २,५०० असल्याचे दर्शवत आहे.
शिवसेना, राष्ट्रवादी काँग्रेस यांच्या दोन शकलांमुळे भाजप-कॉंग्रेसनेही उमेदवार घोषित करताना आवश्यक तो वेळ घेतला. यामुळे उमेदवारांना प्रचाराला कमी वेळ मिळाला. अशातच उन्हाळी सुट्टीमुळे मतदारराजा गावी निघाल्याने मतदारांना रोखून त्यांना मतदान केंद्रापर्यंत आणण्याचे आणि आपल्याला मत देण्यासाठी सर्वच उमेदवारांमध्ये शर्थीचे प्रयत्न सुरू केले आहेत.
आधी मतदान…
कोकणात मतदान असलेल्या मतदारांनी गावाकडची वाट धरल्याने कोकणातील उमेदवारांना दिलासा मिळत आहे. त्यामुळे आपल्याला हक्काचे मत मिळणार, असा विश्वास उमेदवार व्यक्त करत आहेत. मात्र, याच वेळी मुंबईत मतदान असणारे मतदारही सुट्टीनिमित्त गावी गेले किंवा जाणार असल्याने मुंबईतील उमेदवारांची धाकधूक वाढली आहे. यामुळे ‘आधी मतदान, नंतर कोकणात माळरान’, असा प्रेमळ सल्ला उमेदवार गाठीभेटी आणि पदयात्रेत मतदारांना देताना दिसत आहे.
१८ मे ते २० मेदरम्यान रेल्वेगाड्यांची प्रतीक्षायादी
एक्स्प्रेस – शनिवार (१८ मे) – रविवार (१९ मे) – सोमवार (२०मे)
(२२२२९) मडगाव वंदे भारत – ८४- ४९ – ५६
(१२०५१) मडगाव जनशताब्दी – २७२ – २५०- १४१
(२२११९) मडगाव तेजस – १८ – १३ – ५२
(१६३४५) नेत्रावती – ९८ – ९८ – १११
(२०१११) कोकणकन्या – २१९ – १०५ – १७३
(१०१०३) मांडवी – १२५ – १२४ – ११४
(१२६१९) मत्स्यगंधा – ८२ – ८३ – ८८