राज्यातील १३ मतदारसंघांपैकी मुंबईतील तीन आणि ठाणे, कल्याण आणि नाशिक अशा सहा मतदारसंघांत मुख्यमंत्री एकनाथ शिंदे यांच्या शिवसेनेविरोधात शिवसेना उद्धव बाळासाहेब ठाकरे गटात थेट लढत होत आहे. त्यामुळे या लढाईत शिंदे आणि ठाकरे यांची प्रतिष्ठा पणाला लागली आहे. राज्याच्या राजकारणाला कलाटणी देऊ शकणाऱ्या निवडणुकीच्या या निर्णायक टप्प्यात केंद्रीय मंत्री पीयूष गोयल, कपिल पाटील, डॉ. भारती पवार, मुख्यमंत्री शिंदे यांचे चिरंजीव डॉ. श्रीकांत शिंदे, मुंबई काँग्रेसच्या अध्यक्ष वर्षा गायकवाड यांच्यासह एकूण २६४ उमेदवारांचे भवितव्य मतदानयंत्रात बंद होईल.
कडेकोट बंदोबस्त
राज्यातील १३ मतदारसंघांत एकूण २४ हजार ५७९ मतदान केंद्रे असून, २ कोटी ४६ लाखांहून अधिक मतदार मतदानासाठी पात्र आहेत. १६० मतदान केंद्रे संवेदनशील म्हणून घोषित करण्यात आली आहेत. त्यामुळे ठिकठिकाणी स्थानिक पोलिसांसह केंद्रीय सुरक्षा यंत्रणेची मदत घेण्यात आली आहे. एकट्या मुंबई शहरात ५ अतिरिक्त पोलिस आयुक्त, २५ पोलिस उपआयुक्त, ७७ सहायक पोलिस आयुक्तांसह २५ हजार पोलिस अधिकारी आणि कर्मचारी तैनात असतील. याशिवाय ३ दंगल नियंत्रण पथके, गृहरक्षक दलाचे जवान यांच्यासह केंद्रीय सुरक्षा दलाच्या ३६ तुकड्यांची अतिरिक्त कुमक सज्ज ठेवण्यात आली आहे.
देशातील ४९ मतदारसंघांमध्ये चुरस
लोकसभा निवडणुकीच्या पाचव्या टप्प्यात सहा राज्ये आणि दोन केंद्रशासित प्रदेशांतील एकूण ४९ मतदारसंघांमध्ये आज मतदान होणार आहे. त्यात रायबरेली आणि अमेठी या मतदारसंघांचा समावेश आहे. या टप्प्यात उत्तर प्रदेशातील १४ मतदारसंघांमध्ये मतदान होणार आहे. गेल्या निवडणुकीत या १४ पैकी १३ जागांवर भाजपने विजय मिळवला होता. काँग्रेसला फक्त रायबरेलीची जागा मिळाली होती. या १३ जागा राखण्याचे आव्हान भाजपपुढे आहे. जम्मू-काश्मीरच्या बारामुल्ला मतदारसंघातही मतदान होणार असून, तिथे माजी मुख्यमंत्री ओमर अब्दुल्ला यांच्यासह २२ उमेदवार निवडणूक रिंगणात आहेत.