‘सरकारची कामगिरी पाहिली, विरोधकांचे चेहेरे पडले’
‘युती सरकारला दोन वर्ष झाली. सरकार स्थापन झाल्यापासून सतत हे सरकार दोन दिवसांत पडेल, एका महिन्यात पडेल, दोन महिन्यात पडेल असं सुरू झालं. असं करुन सरकार काही पडलं आणि सरकारला ३० तारखेला दोन वर्ष पूर्ण झाली. त्यावेळी सरकार पडावं म्हणून अनेकांनी देव पाण्यात ठेवले होते. परंतु सरकारची कामगिरी पाहून विरोधकांचे चेहेरे मात्र पडले. फेक नरेटिव्हने लोकांना एकदा फसवता येतं, परत-परत फसवता येत नाही. आता जे फसलेत त्यांना चूक कळली आहे’, अशी टीका मुख्यमंत्र्यांनी महाविकास आघाडीवर केली.
बाळासाहेबांच्या विचारांचं हे सरकार – मुख्यमंत्री
‘जनमत पायदळी तुडवून २०१९ मध्ये महाविकास आघाडीचं सरकार आलं. त्यावेळी आम्ही विरोधात उठाव केला आणि नंतर महाराष्ट्रात लोकांच्या मनातलं आणि वैचारिक भूमिकेतून सारखं असलेलं महायुतीच सरकार आलं. सर्वसामान्यांच्या आयुष्यात आनंद निर्माण करणं हे आमचं उद्दिष्ट आहे. राज्याने आर्थिक, शैक्षणिक, औद्यगिक क्षेत्रात प्रगती करावी अशी आमची इच्छा आहे. समाजातील शेवटच्या घटकापर्यंत शासकीय लाभ पोहोचावा ही धडपड होती. महिला, तरुण, शेतकरी यांच्या चेहऱ्यावर आनंद दिसावा हा प्रयत्न होता. यासाठी मोठी मेहनत घेतली. छत्रपती शिवाजी महाराजांचा आदर्श डोळ्यासमोर ठेवून आम्ही कारभार करतो आहे. बाळासाहेब ठाकरे यांच्या विचारांचं सरकार आम्ही स्थापन केलं. जनतेचा विश्वास पाहतो आहोत. त्यांच्यांसाठी घेतलेल्या निर्णयांचा आनंद आहे. विचार, विकास, विश्वास ही आमच्या यशाची त्रिसुत्री आहे’, असं म्हणत त्यांनी महायुती सरकारच्या निर्णयांचा लेखाजोगा मांडला.
आम्ही घरात बसून नाही, लोकांच्या दारी जाऊन काम केलं – एकनाथ शिंदे
‘आमच्या काळात ९ अधिवेशनं पार पडली. ७५ कॅबिनेट झाल्या. त्यात ५५० हून अधिक निर्णय आम्ही घेतले. या काळात बरेच वेताळ आडवे आले, पण आम्ही विकासाचा विक्रम करत गेलो. हे निर्णय आम्ही घेऊ शकलो, कारण आम्ही घरात बसून नाही, तर लोकांच्या दारात जाऊन, शासन आपल्या दारी नेलं. कार्यकर्ता घरात नाही तर लोकांच्या दारात शोभून दिसतो’, असं म्हणत त्यांनी उद्धव ठाकरेंना टोला लगावला.
Ambadas Danve : अंबादान दानवे विधानपरिषदेतून निलंबित, शिवीगाळ प्रकरणी विरोधी पक्षनेत्यांवर कारवाई
सभागृहात शिवीगाळ प्रकरणाबाबत काय म्हणाले शिंदे?
‘विधिमंडळ लोकशाहीचा प्रमुख स्तंभ आहे. या सभागृहाचा सन्मान ठेवण्याची जबाबदारी आपल्या सर्वांची आहे. विरोधकांना आपल्या जबाबदारीचं भान आहे की नाही हे माहिती नाही. सभागृहाबाहेर विरोधक सतत आरोप करतात. आता सभागृहामध्येही ते शिवीगाळ करतात. हे दुर्दैवी आहे. असं कधीही झालं नव्हतं, ते घडलं. आम्ही केलेल्या कामाने तुमचा संयम सुटत असेल, मात्र तो संयम राखा, विरोधक म्हणून काम करण्याची सवय लावा. कारण तुम्हाला यापुढेही तिकडेच विरोधातच बसायचं आहे’, असं म्हणत एकनाथ शिंदेंनी विरोधकांना टोला लगावला.