लोकसभा निवडणुकीत राष्ट्रवादी काँगेस ही भाजप आणि शिवसेनेसोबत महायुती म्हणून लढली. परंतु, राष्ट्रवादीला केवळ चारच जागा लढविण्यासाठी मिळाल्या. त्यातीलही केवळ रायगडची जागा पक्षाला जिंकता आली. त्यानंतर राष्ट्रीय स्वयंसेवक संघाच्या विचारसरणीचा पुरस्कार करणाऱ्या ऑर्गनायझर या मासिकात राष्ट्रवादीला सोबत घेऊन भाजपची प्रतिमा डागाळली आणि फारसा फायदाही झाला नाही, अशी टीका करण्यात आली. याविषयी राष्ट्रवादी काँग्रेस शरद पवार पक्षाचे आमदार रोहित पवार यांनी एक्सवर प्रतिक्रिया दिली आहे.
अजित दादांमुळे भाजपने स्वतःची ब्रॅण्ड व्हॅल्यू संपविल्याची आधी ऑर्गनायझरमधून झालेली टीका, नंतर १० वर्षे शांत झोपलेल्या कथित गांधींनी (अण्णा हजारे) अचानक जागे होऊन शिखर बँक प्रकरणी अजितदादांच्या क्लीन चिटविरोधात न्यायालयात जाण्याची घेतलेली भूमिका आणि काल सुनेत्रा पवार यांच्या राज्यसभेचा अर्ज भरताना एकाही भाजपेयीची नसलेली उपस्थिती हा घटनाक्रम लक्षात घ्या, असे रोहित पवार यांनी म्हटले आहे.
वापरा आणि फेकून द्या ही भाजपची प्रवृत्ती असून त्यानुसार ते आज अजितदादांसोबत वागत आहेत, हा स्पष्ट संदेश आहे. भाजप हा पक्ष लोकनेत्यांना संपवतो हे आम्ही पहिल्यापासून सांगतोय, असेही पवार यांनी लिहिले आहे. एकीकडे अजित पवार यांच्या फारकतीमुळे पक्षाची दोन शकले झाले असताना, आमदार रोहित पवार यांनी त्यांच्यासाठी लिहिलेल्या या पोस्टमुळे राजकीय वर्तुळात अनेकांच्या भुवया उंचावल्या आहेत.