पुणे लोकसभेच्या गेल्या दोन निवडणुकीत भाजपचा उमेदवार तीन लाखांहून अधिक मतांनी निवडून आला आहे. या पार्श्वभूमीवर भाजपच्या गोटात आत्मविश्वास असला, तरी काँग्रेसने शहरात तगडे आव्हान उभे केले आहे. काँग्रेसला पु्ण्यातून आशेचे किरण दिसत असल्याने राहुल गांधी यांच्यासह माजी केंद्रीय मंत्री शशी थरूर, माजी मुख्यमंत्री पृथ्वीराज चव्हाण, प्रदेशाध्यक्ष नाना पटोले, विधानसभेतील विरोधी पक्षनेते विजय वडेवट्टीवार, ज्येष्ठ नेते बाळासाहेब थोरात, सुनील केदार यांच्यासह डझनभर आमदार पुण्यात तळ ठोकून आहेत. याशिवाय ज्येष्ठ नेते शरद पवार, आदित्य ठाकरे, संजय राऊत हेही प्रचारात उतरणार आहेत.
भाजपकडून पुण्याच्या निवडणुकीत उपमुख्यमंत्री देवेंद्र फडणवीस, अजित पवार, उच्च व तंत्रशिक्षण मंत्री चंद्रकांत पाटील यांनी विशेष लक्ष घातले आहे. अजित पवार हे ‘बारामती’त व्यग्र होते. त्यामुळे शेवटच्या चार दिवसांत ते पुण्यात लक्ष देतील. फडणवीस यांना महायुतीतील सर्वच प्रश्नांमध्ये लक्ष घालावे लागत असल्याने त्यांची ओढाताण सुरू असल्याचे दिसते.
शहरात गेल्या दहा वर्षांत केलेली विकासकामे आणि पंतप्रधान नरेंद्र मोदी यांना पंतप्रधान करण्यासाठी भाजपच्या उमेदवाराला मत द्या, या भूमिकेवर भाजपच्या प्रचाराचा भर आहे; तर सर्वसामान्य व्यक्ती, मदतीला धावून जाणारा उमेदवार, केंद्र सरकारच्या योजनांवर टीका, बेरोजगारीचा मुद्दा यावर काँग्रेस जोर देत आहे. भाजपने मध्यमवर्गीयांना तर काँग्रेसने दलित-मुस्लिम; तसेच झोपडपट्टीवासीयांना समोर ठेवून प्रचाराची रणनीती आखल्याचे चित्र पुण्यातील प्रचारात दिसते आहे. काँग्रेस आणि भाजप दोघांनाही पक्षांतर्गत नाराजीला सामोरे जावे लागले आहे. काँग्रेसकडून बाळासाहेब थोरात यांनी; तर भाजपकडून फडणवीस यांनी बैठका घेऊन संबंधितांना कानपिचक्या दिल्या होत्या.
Lok Sabha Election: वेध मतदारसंघाचा: मावळच्या बालेकिल्ल्यासाठी शिवसेनेत लढाई, सरकारविरोधी लहरीचा दावा
वंचित, ‘एमआयएम’चे आव्हान
पुण्यात वंचित बहुजन आघाडीकडून वसंत मोरे; तसेच ‘एमआयएम’कडून अनिस सुंडके रिंगणात आहेत. मोरे हेसुद्धा २०१७ला महापालिकेचे नगरसेवक होते; तर सुंडके स्थायी समितीचे माजी अध्यक्ष आहेत. सुंडके राष्ट्रवादी काँग्रेसमध्ये १९९९पासून कार्यरत होते. शरद पवार उद्धव ठाकरे यांच्यासमवेत गेले; तर उपमुख्यमंत्री अजित पवार महायुतीत भारतीय जनता पक्षासोबत गेल्यामुळे राष्ट्रवादी काँग्रेसला सोडचिठ्ठी देऊन ‘एमआयएम’मध्ये प्रवेश केल्याचे ते सांगतात. लोकसभा निवडणूक लढवण्यावर ठाम असलेल्या वसंत मोरे यांनी महाराष्ट्र नवनिर्माण सेनेला रामराम ठोकला. त्यानंतर विविध पक्षांच्या नेत्यांची भेट घेतली. अखेर वंचित बहुजन आघाडीने त्यांना पुणे लोकसभेची उमेदवारी जाहीर केली. मोरे आणि सुंडके यांचे किती मोठे आव्हान या निवडणुकीत उभे राहणार, ही उत्सुकतेची बाब आहे.
‘मनसे’ची रसद
महाराष्ट्र नवनिर्माण सेनेने महायुतीला पाठिंबा दिल्यानंतर अमित ठाकरे यांनी पुण्यात पक्षाच्या पदाधिकाऱ्यांची बैठक घेऊन समन्वय साधला होता. त्यानंतर मनसेचे अध्यक्ष राज ठाकरे यांची सभा पुण्यात झाली आहे. मनसेकडून महायुतीला मदत करण्याची भूमिका घेतल्याने भाजपचे उमेदवार मुरलीधर मोहोळ यांना दिलासा मिळाला आहे.
प्रचारातील कळीचे मुद्दे
महायुती
– पुण्याच्या विकासाचा वेग कायम ठेवण्यासाठी
– नरेंद्र मोदी यांना पंतप्रधान करण्यासाठी
– सांडपाणी शुद्धिकरण, नदीकाठ सुधारणा, पुण्यासाठी स्वतंत्र विमानतळ, मेट्रोचे जाळे, झोपडपट्टी पुनर्विकास
– वाहतूक कोंडी सोडविणे
महाविकास आघाडी
– महागाई, बेरोजगारी
– पुण्याचा विकास रखडला. प्रकल्पांमध्ये गैरव्यवहार.
– पर्यावरणाचा ऱ्हास करणारे प्रकल्प.
– मेट्रोचे मार्ग रखडले.
एकूण मतदान- २० लाख ५५ हजार ७४१
पुरुष- १० लाख ५५ हजार ६२
महिला- १० लाख ३५५
तृतीयपंथी – ३२४