राज्यातील भाजपच्या नेत्यांनी विधान परिषदेसाठी दहा उमेदवारांची नावे निश्चित करीत ही यादी केंद्राकडे अंतिम मंजूरीसाठी पाठवल्याचे खात्रिलायकरित्या समजते. या दहा नावांमध्ये माजी मंत्री रावसाहेब दानवे, पंकजा मुंडे, हर्षवर्धन पाटील, चित्रा वाघ, अमित गोरखे, परिणय फुके, सुधाकर कोहळे, योगेश टिळेकर, निलय नाईक आणि माधवी नाईक यांच्या नावाचा समावेश असल्याचे समजते.
विधान परिषद निवडणूक अतिशय चुरशीची होणार
विधान परिषदेच्या ११ जागांसाठी होत असलेली निवडणूक अतिशय चुरशीची होणार आहे. दोन उमेदवार निवडून येण्याची शक्यता असताना महाविकास आघाडी देखील तिसरा उमेदवार देण्याच्या तयारीत आहेत. रिक्त जागांनुसार, महायुतीचे ९ तर महाविकास आघाडी दोन उमेदवार निवडून येऊ शकतात. लोकसभा निकालांमुळे आमदारांमधली अस्वस्थता ओळखून आणि संभाव्य राजकीय समीकरणे पाहता आघाडीकडून तिसरा उमेदवार देऊन खेला होबे करण्याचा प्रयत्न होऊ शकतो.
विधानपरिषदेतून ११ आमदार निवृत्त झाले असून त्यांच्यासाठी निवडणूक कार्यक्रम आयोगाकडून प्रसिद्ध करण्यात आला आहे. विधान परिषदेतील आमदार निवडून आणण्यासाठी विधानसभेतील आमदार मतदान करतात. सध्या विधानसभेतील आमदारांची संख्या २७४ असून परिषदेत आमदार निवडून आणण्याचा कोटा २३ इतका आहे. भारतीय जनता पक्षाकडे सध्या १०५ आमदार असून, अजितदादांकडे ४० आणि एकनाथ शिंदेंकडे ३८ आमदार आहेत. तर इकडे काँग्रेसकडे ३७, ठाकरे गटाकडे १५ तर शरद पवार यांच्या राष्ट्रवादीकडे १० आमदार आहेत.