मुंबई उत्तर पश्चिम लोकसभा मतदारसंघाची निवडणूक सुरुवातीपासूनच नाट्यमय होती. विद्यमान खासदारांनी शिवसेनेत प्रवेश केला असताना त्यांच्या मुलाला शिवसेना (उद्धव बाळासाहेब ठाकरे) पक्षाने तिकीट दिले. रवींद्र वायकर यांनी ऐनवेळी शिवसेनेत प्रवेश केला. त्यांना येथून रिंगणात उतरवले गेले. अमोल कीर्तिकर पहिल्यांदाच निवडणूक लढवत असले, तरीही वडिलांच्या निवडणुकीचा अनुभव, आधीच घोषित झालेले तिकीट, यामुळे त्यांचा संपूर्ण मतदारसंघात दमदार जनसंपर्क झाला होता. त्याचे चित्र निकालात दिसले.
दुसरीकडे वायकर यांचा संपूर्ण लोकसभा मतदारसंघात संपर्क नसला, तरीही ३५ वर्षे लोकप्रतिनिधी म्हणून असलेला अनुभव पाठीशी होता. त्यानुसार त्यांनी जेमतेम २० दिवसांच्या प्रचारात पूर्ण ताकदीने लढा दिला. त्यामुळेच ही लढत अखेरच्या फेरीपर्यंत अटीतटीची झाली.
या मतदारसंघातील ९ लाख ५१ हजार ५८० मतांची मोजणी एकूण २६ फेऱ्यांमध्ये झाली. पहिल्या काही फेऱ्यांपर्यंत वायकर साधारण ४,५०० मतांनी आघाडीवर होते. मात्र त्यानंतर अमोल कीर्तिकर हे बाजी मारत आघाडीवर गेले. १८व्या फेरीपर्यंत ही आघाडी १९ हजारांच्या घरात गेली होती. त्यावेळी कीर्तिकर जिंकणार हे निश्चित झाले होते. मात्र त्यानंतर कीर्तिकर यांच्या आघाडीत २,२४० पर्यंत घट होत गेली. २१ ते २३ फेऱ्यांपर्यंत वायकर यांनी ५१० मतांची आघाडी घेतली होती. त्यावेळी गोरेगाव, राममंदिर परिसरातील मतांची मोजणी सुरू होती. तेथे वायकर यांनी चांगली मते घेतली. मात्र २४ व्या फेरीत पुन्हा कीर्तिकर यांनी ९५८ मतांनी आघाडी घेतली. ही आघाडी २५ व्या फेरीअखेर पुन्हा २५० वर आली. त्यामुळे अखेरच्या फेरीतील उत्सुकता शिगेला गेली होती व नेमका तिथेच खेळ रंगला.
अखेरच्या फेरीनंतर कीर्तिकर ६२१ मतांनी विजयी झाले होते. त्यामध्ये वायकर यांनी एका मतदान केंद्रावरील मतांची फेतमोजणीची मागणी केली होती. मात्र त्यातून फार काही साध्य झाले नाही. त्यानंतर आयोगाने सुरुवातीला मोजणी केलेल्या टपाली मतपत्रिकांची बेरीज जोडली. त्यात वायकर हे आश्चर्यकारकरित्या ४८ मतांच्या आघाडीने जिंकले. या टपाल मतांमधील १११ मते रद्दबातल ठरली. त्यांची पडताळणी करण्याची मागणी कीर्तिकर यांनी केली. मात्र पडताळणीअंती रवींद्र वायकर हे ४ लाख ५२ हजार ६४४ मते घेत विजयी झाले. अमोल कीर्तिकर यांना ४ लाख ५२ हजार ५९६ मते मिळाली.
निवडणुकीदरम्यान दोन्ही प्रमुख उमेदवारांकडून अनपेक्षित भागात मतांची जुळवाजुळव करण्यात आल्याचे मतमोजणीदरम्यान दिसले. जोगेश्वरी हा वायकर यांचा बालेकिल्ला आहे, मात्र तेथे कीर्तिकरांनी आघाडी घेतली. वायकर हे शिवसेनेत आले त्यावेळी जोगेश्वरीतील मूळ शिवसेना पदाधिकारी त्यांच्यासह आले नव्हते. त्याचा फटका वायकर यांना बसल्याचे दिसले. वर्सोवा मतदारसंघातील उच्चभ्रू व सिनेतारकांचा भाग असलेल्या मतदारांकडून वायकर यांना मोठी साथ मिळाली. तेथील वेसावे कोळीवाड्यात कीर्तिकर यांनी अपेक्षेप्रमाणे आघाडी घेतली. दिंडोशी, नागरी निवारा वसाहत हा मराठी भाषकांचा भाग सुरुवातीपासून उद्धव ठाकरे यांच्या पाठीशी असतो. मात्र त्या भागातील अनेक मतदारांनी वायकर यांना साथ दिल्याचे दिसले.
Uddhav Thackeray : शिंदे गटातील चौघांनीच खासदारकी टिकवली, ठाकरेंची साथ सोडणाऱ्यांचं काय झालं?Read Latest Maharashtra News Updates And Marathi News
तेथील शिवसेना (उद्धव बाळासाहेब ठाकरे) पक्षाचे आमदार सुनील प्रभू यांची संपूर्ण निवडणुकीदरम्यान असलेली शांतता यामागे असल्याची चर्चा कीर्तिकर यांच्या गोटात मतमोजणी केंद्रावर होती. अंधेरी पश्चिम हा तसा भाजपचे प्राबल्य असलेला भाग असताना तेथील गिल्बर्ट हिल भागातील केवळ मुस्लिम समाजच नाही, तर अनेक भागातूनही कीर्तिकर यांना मते मिळाल्याचे दिसले. अंधेरी पूर्व भागात शिवसेना (उद्धव बाळासाहेब ठाकरे) पक्षाच्या आमदार आहेत. मात्र त्याठिकाणी वायकर यांना दमदार मते मिळाल्याचे कीर्तिकर यांच्या कार्यकर्त्यांनी सांगितले.
अखेरचा भाग कीर्तिकर यांचे निवासस्थान मात्र भाजपचे आमदार असलेल्या गोरेगाव मतदारसंघाचा आहे. त्या ठिकाणची मतमोजणी लांबली होती. अखेरच्या मोजणीवेळी तेथील राममंदिर, मोतिलालनगर या भागातील प्रत्येक ईव्हीएममधून दोन्ही उमेदवारांना तुल्यबळ मते मिळत होती. एकूणच दोघांनीही प्रत्येक भागात समसमान मते घेतल्यानेच ही लढत अटीतटीची झाली व नाट्यमयरित्या रवींद्र वायकर यांनी त्यात विजय मिळवला.