क्राईम ब्रांचनं भावेश भिंडेला काल (१६ मे) राजस्थानच्या उदयपूरमधून अटक केली. एका रिसॉर्टमधून त्याला बेड्या ठोकण्यात आल्या. भिंडेच्या अटकेपर्यंतचा घटनाक्रम आता समोर आला आहे. घाटकोपरच्या छेडा नगरमधील महाकाय होर्डिंग पडल्याचं समजताच भिंडेनं अटकेच्या भीतीनं पळ काढला. तो चालकासह कारमधून फरार झाला. त्यानं लोणावळा गाठलं. एका बंगल्यात काही तास त्याचा मुक्काम होता. भिंडे हा होर्डिंग कंपनीचा मालक आहे. इगो मीडिया नावाची त्याची कंपनी आहे.
पोलीस मागावर असल्याचं समजल्यानं भिंडे लोणावळ्यातील बंगल्यात लपून बसला होता. पोलीस आपल्यापर्यंत पोहोचतील याची भीती असल्यानं त्यानं तिथून मुक्काम हलवला. त्यानं चालकाला दुसरं सीम कार्ड आणण्यास पाठवलं. त्यानंतर तो एक्स्प्रेस वेनं थेट अहमदाबादला पोहोचला. तिथे तो एका नातेवाईकाकडे थांबला. पोलीस आपला शोध घेत असल्याची माहिती त्याला बातम्यांच्या माध्यमातून समजली.
Mumbai Hoarding Collapse: स्टॅबिलिटी रिपोर्ट, ८ होर्डिंग अन् ६ कोटींची नोटीस; घाटकोपर प्रकरणात धक्कादायक तपशील उघड
अहमदाबादमधून त्यानं राजस्थानातील उदयपूर गाठलं. तिथे त्यानं एका रिसॉर्टमध्ये वास्तव्य केलं. तिथे त्याच्या भाच्यानं एक रुम बुक केली होती. भिंडे रिसॉर्टमध्ये लपला असल्याची माहिती क्राईम ब्रांचला मिळाली. त्यानंतर पोलीस तिथे पोहोचले. त्यांनी भिंडेला बेड्या ठोकल्या. तीन दिवस क्राईम ब्रांचचे पोलीस त्याच्या मागावर होते. भिंडे सातत्यानं लोकेशन बदलत होता आणि पोलीस त्याचा माग काढत होते.
घाटकोपर होर्डिंग प्रकरणाचा संपूर्ण तपास आता क्राईम ब्रांचकडे सुपूर्द करण्यात आला आहे. त्यांनी रेल्वेकडून या संदर्भातील सर्व कागदपत्रं, दस्तावेज मागवले आहेत. गैरव्यवहार नेमका कसा झाला, परवानग्या कोणी दिल्या, भावेशला पळताना कोणी कोणी मदत केली, या सगळ्याचा तपास क्राईम ब्रांचनं सुरु केला आहे.