मुंबई पोलिसांनी कोर्टासमोर सांगितलं की, राजेश शाहने मुलगा मीहिरला अनेकदा कॉल केले आणि त्याला ड्रायव्हर राजऋषी बिडावतसोबत सीट बदलण्यास सांगितलं. ड्रायव्हर तेव्हा पॅसेंजर सीटवर बसलेला होता. मुलाला वाचवण्यासाठी ड्रायव्हरवर आरोप लावण्याचा राजेश शाहचा प्लॅन असल्याचं, पोलिसांनी कोर्टात सांगितलं.
महिलेला दोन किमी फरफटत नेलं, मग पुन्हा अंगावर कार घातली
मीहिर शाहने कावेरी नाखवा यांना धडक दिली त्यानंतर त्याने त्यांना तब्बल दोन किलोमीटरपर्यंत फरफटत नेलं. त्यानंतर वरळी सीलिंक येथे त्याने गाडी थांबवली. त्यानंतर त्यांनी बंपरमध्ये अडकलेल्या कावेरी यांना बाहेर काढलं. मग, ड्रायव्हर हा ड्रायव्हिंग सीटवर बसला. त्यानंतर त्यांनी गाडी पुन्हा मागे घेतली आणि ती कावेरी यांच्या अंगावर घालून तिथून पळ काढला. ही घटना तिथल्या सीसीटीव्हीमध्ये कैद झाली आहे.
७ जुलैला पहाटे एका भरधाव बीएमडब्ल्यू कारने दुचाकीवरील एका जोडप्याला जोरदार धडक दिली. वरळी परिसरात ही घटना घडली. या घटनेत ४५ वर्षीय कावेरी नाखवा यांचा मृत्यू झाला तर त्यांचे पती प्रदीप हे जखमी झाले. ही गाडी मीहिर शाह (२४ वर्ष) नावाचा तरुण चालवत होता. मीहिर शाह हा शिवसेनेचे नेते राजेश शाह यांचा मुलगा आहे.
राजेश शाहला १५ हजार रुपयांच्या जातमुचलक्यावर जामीन मंजूर
याप्रकणी मीहिर शाहवर कलम १०५, २८१, १२५ ब, २३८, ३२४ (४) अंतर्गत गुन्हा दाखल करण्यात आला आहे. पोलिसांनी या प्रकरणी राजेश शाह आणि राजऋषी बिदावतला अटक केली होती. तर मिहिर हा सध्या फरार असून पोलिस त्याचा शोध घेत आहे. सोमवारी न्यायालयाने राजेश शाहला १५ हजार रुपयांच्या जातमुचलक्यावर जामीन मंजूर केला आहे. सध्या पोलिस या प्रकरणाचा कसून तपास करत आहेत.