नूर शाहिस्ता अन्सारी (वय ३५), अमिना अदिल अन्सारी (वय १३), मारिया अन्सारी (वय ७), हुमेदा अन्सारी (वय ६) आणि अदनान अन्सारी (वय ४, सर्व रा. सय्यदनगर, हडपसर) अशी भुशी धरणाच्या मागील बाजूस असलेल्या धबधब्याच्या पाण्याच्या प्रवाहात वाहून गेलेल्यांची नावे आहेत. यामध्ये मारिया आणि अदनान अद्याप बेपत्ता असून, उर्वरित तिघांचे मृतदेह सापडले आहेत. लोणावळा शहर पोलिसांनी दिलेल्या माहितीनुसार, सय्यदनगर येथील अन्सारी परिसरातील १५ ते १६ जण रविवारच्या सुटीचे औचित्य साधून लोणावळ्यात वर्षाविहारासाठी सकाळी आले होते. ते सर्व जण १२ वाजेदरम्यान लोणावळ्यातील भुशी धरणाच्या मागील बाजूच्या धबधब्याकडे गेले होते. या ठिकाणी एकूण मोठे धबधबे असून त्यांचा संगम धरणाच्या पाणलोट क्षेत्रात होतो.
अचानक पाणी वाढल्याने दुर्घटना
अन्सारी परिवारातील सदस्य एका धबधब्याच्या पाण्यात भिजण्याचा आनंद लुटत होते. त्या वेळी भुशी डॅमच्या परिसरात आणि पठारावर मुसळधार पाऊस पडला. त्यामुळे धबधब्याच्या पाण्याची पातळी वाढत गेली. मात्र, त्याची कल्पना अन्सारी कुटुंबीयांना आली नाही. काही कळण्यापूर्वीच पाण्याचा मोठा प्रवाह आला आणि सर्व जण अडकले. मदतीच्या अपेक्षेने काठावरील लोकांकडे पाहणारे अन्सारी कुटुंबीय पाण्याच्या प्रवाहात वाहून गेले. त्यापैकी एक मुलगी आणि एक पुरुष वाचले.
लग्नसोहळ्याच्या निमित्ताने एकत्र
लग्नसोहळ्याच्या निमित्ताने अन्सारी कुटुंबीय आणि नातेवाईक एकत्र आले होते. चार दिवसांपूर्वी लग्न झाले. घरात आनंदाचे वातावरण होते. मात्र, आनंदी कुटुंबावर रविवारी दुःखाचा डोंगर कोसळला. लग्नासाठी आग्रा येथून नातेवाईकांसह अन्सारी कुटुंबीय पावसाळी पर्यटनासाठी लोणावळ्याला गेले. मात्र, धबधब्याच्या पाण्याची पातळी अचानक वाढल्याने अन्सारी कुटुंबातील दहा जण वाहून गेले. पाच जण सुखरूप बाहेर पडले. मात्र, पाच जण वाहून गेले. तिघांचे मृतदेह बचाव पथकाच्या हाती लागले असून, दोघे बेपत्ताच आहेत.
मौलाना सलमान अन्सारी सय्यदनगर लेन नंबर २१ येथे राहतात. त्यांच्या शेजारीच त्यांचे मेहुणे तारिक अन्सारी राहतात. मौलाना अन्सारी यांचे मेव्हणे तारिक अन्सारी आणि गुलजार अन्सारी यांचे २५ तारखेला लग्न होते. लग्न सय्यदनगर येथेच झाले. लग्नासाठी त्यांचे नातेवाईक घरी आले होते. मौलाना अन्सारी यांच्या दोन मुली आणि मेव्हणी नूर शाहिस्ता अन्सारी यांच्यासह अनेक जण लोणावळ्याला भुशी डॅम येथे गेले.
दुपारीच लोणावळ्याच्या धबधब्यात पाच जण बुडाल्याची माहिती मिळाली. मझर अन्सारी यांनी सांगितले, की माझी बहीण गुलजार अन्सारी यांचे तारिक अन्सारीसोबत लग्न झाले. आग्र्यावरून काही नातेवाइक लग्नाला आले होते. पुण्यातील लोणावळा हे प्रसिद्ध पर्यटनस्थळ असल्यामुळे नातेवाइकांनी लोणावळ्याला जाण्याची इच्छा व्यक्त केली. त्यामुळे अन्सारी कुटुंबीय सकाळी लोणावळ्याला फिरायला गेले होते.
वर्ल्डकपचा आनंद साजरा करणाऱ्यांना घरात घुसून मारलं, नांदेडमध्ये तणाव, भाजप पदाधिकाऱ्यांचा पोलीस ठाण्यात ठिय्या
धबधब्यात तरुण वाहून गेला
ताम्हिणीतील प्लस व्हॅलीमध्ये गेलेला एक तरुण धबधब्यात खेळताना पाण्याचा अंदाज न आल्याने शनिवारी धबधब्यातून वाहून गेला. रविवारी सायंकाळपर्यंत तरुणाचा तपास लागला नव्हता. पावसाचा जोर वाढल्याने सायंकाळी शोध मोहीम थांबविण्यात आली. ताम्हिणी अभयारण्यामध्ये ही घटना घडली. स्वप्नील धावडे असे धबधब्यातून वाहून गेलेल्या तरुणाचे नाव असून, तो पिंपरी-चिंचवड भागात वास्तव्यास होता.