शुक्रवार १७ मे रोजी शिवाजी पार्कवर कोणाची सभा होणार, या बहुप्रतीक्षित आणि बहुचर्चित प्रश्नाचं उत्तर अखेर मिळालं आहे. कारण मुंबईतील प्रसिद्ध छत्रपती शिवाजी महाराज पार्कचे मैदान अखेर महाराष्ट्र नवनिर्माण सेनेने मारले आहे. शिवसेना (उद्धव बाळासाहेब ठाकरे) आणि मनसे या दोन्ही पक्षांनी शुक्रवार १७ मे या दिवसासाठी शिवाजी पार्कच्या मैदानासाठी अर्ज केले होते. मात्र प्रथम येणाऱ्यास प्राधान्य या तत्त्वानुसार मुंबई महापालिका प्रशासनाने मनसेला सभेसाठी परवानगी दिल्याची माहिती आहे. त्यामुळे महायुतीच्या प्रचाराची सांगता या मैदानावर होईल.
याआधी दसरा मेळाव्याच्या वेळीही ठाकरे गटाला शिवाजी पार्कचे मैदान मिळाले नव्हते. एकनाथ शिंदे यांच्या नेतृत्वातील शिवसेनेने आधी अर्ज केल्यामुळे शिवाजी पार्कवर शिवसेनेचा पारंपरिक दसरा मेळावा झाला होता. तर ठाकरेंना बीकेसीच्या मैदानावर दसरा मेळाव्यासाठी समाधान मानावे लागले होते, यावेळीही उद्धव ठाकरेंना बीकेसीच्या मैदानावर महाविकास आघाडीच्या प्रचाराचा अखेर करावा लागू शकतो. परंतु त्यांना बीकेसीचे मोठे मैदानही मिळू नये, यासाठी महायुतीतर्फे तिथल्या जागेसाठी अर्ज करण्यात आल्याची चर्चा आहे.
Read Latest Maharashtra News Updates And Marathi News
दरम्यान पंतप्रधान नरेंद्र मोदी या प्रचारसभेला उपस्थित राहण्याची शक्यता वर्तवली जात आहे. त्यामुळे मनसे अध्यक्ष राज ठाकरे आणि नरेंद्र मोदी हे एकाच मंचावर पाहायला मिळू शकतात. याशिवाय मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि केंद्रीय राज्यमंत्री रामदास आठवले हे महायुतीतील प्रमुख नेतेही या सभेला उपस्थित राहण्याची शक्यता आहे.