बारामतीमध्ये गेल्या तीन निवडणुकांमध्ये सुप्रिया सुळे विजयी झाल्या आहेत. यंदा प्रथमच त्यांच्यासमोर घरातूनच कडवे आव्हान उभे राहिले असून, अजित पवार यांच्या पत्नी सुनेत्रा पवार यांच्या उमेदवारीमुळे या लढतीबाबत पहिल्या दिवसापासून सर्वांना उत्सुकता आहे. राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांनी संपूर्ण बारामती लोकसभा मतदारसंघ पिंजून काढला आहे, तर उपमुख्यमंत्री अजित पवार यांनीही जुन्या वादांना पूर्णविराम देऊन, सुनेत्रा यांच्या विजयासाठी नवी समीकरणे जोडली आहेत.
बारामती लोकसभा मतदारसंघात बारामती, दौंड, इंदापूर, पुरंदर, भोर आणि खडकवासला या सहा विधानसभा मतदारसंघाचा समावेश आहे. बारामती मतदारसंघात निवडणुकीच्या कामासाठी १३ हजार कर्मचारी, अधिकारी तैनात करण्यात आले आहेत; तसेच तीन हजार पोलिस बंदोबस्तासाठी सज्ज आहेत. या मतदारसंघात एकूण दोन हजार ५१६ मतदान केंद्रे असून, भोर विधानसभा मतदारसंघात सर्वाधिक ५६१ मतदान केंद्रे आहेत.
बारामती लोकसभा मतदारसंघात होणाऱ्या निवडणुकीसाठी नियोजनाप्रमाणे तयारी करण्यात आली आहे. मतदान पथकाला साहित्याचे वितरण करण्यात आले आहे. सोमवारी सायंकाळी मतदान केंद्रावर अधिकारी, कर्मचारी पोहोचले आहेत. सकाळी सात वाजता मतदानाला सुरुवात होणार असून, सायंकाळी सहा वाजेपर्यंत मतदान करता येणार आहे.- कविता द्विवेदी, निवडणूक निर्णय अधिकारी, बारामती लोकसभा मतदारसंघ
दिग्गजांची प्रतिष्ठा पणाला
मुंबई : लोकसभा निवडणुकीच्या तिसऱ्या टप्प्यात राज्यात सर्वाधिक लक्षवेधी ठरलेल्या बारामती, सोलापूरसह ११ मतदारसंघांमध्ये आज, मंगळवारी मतदान होणार आहे. राष्ट्रवादी काँग्रेस (शरदचंद्र पवार) पक्षाचे सर्वेसर्वा शरद पवार आणि काँग्रेसचे ज्येष्ठ नेते सुशीलकुमार शिंदे यांच्या कन्या निवडणूक रिंगणात असल्याने या दोन्ही नेत्यांची प्रतिष्ठा पणाला लागली आहे. केंद्रीय मंत्री नारायण राणे, राष्ट्रवादी काँग्रेसचे प्रदेशाध्यक्ष सुनील तटकरे, भाजपचे राज्यसभा सदस्य उदयनराजे भोसले, शाहू महाराज छत्रपती यांच्यासह राज्यातील एकूण २५८ उमेदवारांच्या राजकीय भवितव्याचा फैसला आज दोन कोटींहून अधिक मतदार करणार आहेत.