कल्याणीनगर येथे १८मेच्या मध्यरात्री भरधाव आलिशान कारच्या धडकेत दुचाकीवरील दोघांचा मृत्यू झाला (Pune Porsche Car Accident). या प्रकरणी येरवडा पोलिस ठाण्यात गुन्हा दाखल झाला. अपघातग्रस्त कार चालविणाऱ्या अल्पवयीन मुलाने मद्यप्राशन केल्याचे प्रत्यक्षदर्शींचे म्हणणे होते. त्यामुळे रविवारी (१९ मे) सकाळी त्या मुलाला ‘ससून रुग्णालया’त वैद्यकीय तपासणीसाठी नेण्यात आले होते. या ठिकाणी तपासणीसाठी घेतलेला रक्ताचा नमुना बदलण्यात आल्याचे पोलिस तपासात समोर आल्यानंतर ‘ससून’च्या न्यायवैद्यक प्रयोगशाळेचे प्रमुख डॉ. अजय तावरे आणि आपत्कालीन विभागातील वैद्यकीय अधिकारी डॉ. श्रीहरी हाळनोर यांच्यासह अजय घटकांबळे याला अटक करण्यात आली. या तिघांची रवानगी सध्या पोलिस कोठडीत करण्यात आली असून, त्यांची गुन्हे शाखेकडून चौकशी सुरू आहे.
नमुना आरोपीचा; तपासणी भलत्याचीच
‘विशाल अगरवाल याने घटकांबळे याच्या माध्यमातून डॉ. तावरेशी संपर्क साधून या प्रकरणात मदत करण्याची विनंती केली. त्यावर डॉ. तावरेनेच विशाल अगरवालला रक्ताचा नमुना बदलण्याचा सल्ला दिला. रक्त बदलल्यानंतर मद्यप्राशन केल्याचा अहवाल येणार नाही आणि त्याचा केसमध्ये फायदा होईल, असे तावरेने सांगितले. त्यानुसार, त्यांनी रक्त अल्पवयीन आरोपीचे घेतले खरे; मात्र ते तपासणीसाठी न देता दुसऱ्याच व्यक्तीचे रक्त दिले,’ असे वरिष्ठ पोलिस अधिकाऱ्यांनी सांगितले. या प्रकरणात डॉ. हाळनोरला तीन लाख रुपये मिळाले. त्यातील अडीच लाख रुपये त्याने स्वत:कडे ठेवले आणि ५० हजार रुपये घटकांबळेला दिले. गुन्हे शाखेच्या पोलिसांनी दोघांकडूनही पैसे जप्त केले आहेत, असेही पोलिसांनी सांगितले.
‘भ्रष्टाचार प्रतिबंधक कायद्या’नुसार कारवाई
पैसे स्वीकारून अल्पवयीन मुलाचा रक्ताचा नमुना बदलल्‍या प्रकरणी आणि रक्ताचा बनावट अहवाल तयार होण्यास हातभार लावल्याप्रकरणी डॉ. अजय तावरे, डॉ. श्रीहरी हळनोर आणि अजय घटकांबळे या तिघांविरोधात ‘प्रीव्हेन्शन ऑफ करप्शन ॲक्‍ट’अन्वये, कारवाई करण्यात येणार आहे. त्यासाठी आवश्यक प्रक्रिया सुरू करण्यात आली आहे.
नेमके काय घडले?
– डॉ. हाळनोर याला तीन लाख रुपये मिळाले. ते पैसे जप्त करण्यात आले आहेत. ते पैसे कोणामार्फत आले हे स्पष्ट होऊ शकलेले नाही.
– डॉ. अजय तावरेच्या कॅम्प परिसरातील गीता सोसायटीतील घराची गुन्हे शाखेने मंगळवारी (२८ मे) रात्री उशिरा झडती घेतली. अन्य दोन आरोपींच्या घराचीही पोलिसांनी झडती घेतली.
– डॉ. तावरे आणि डॉ. हाळनोर यांनी रक्ताचा नमुना बदलताना नेमके कोणाचे रक्त दिले, हे अद्याप गुलदस्तातच आहे.