आरोपी वेदांत अगरवाल याला आज बाल हक्क न्याय मंडळासमोर हजर करण्यात आले. तसेच, त्याच्यावर लावलेल्या गुन्ह्याच्या कलमातही वाढ करण्यात आली आहे. दारु पिऊन कार चालवली असल्याने त्याच्यावर १८५ कलमांतर्गत नव्याने गुन्हा दाखल करण्यात आला आहे. याप्रकरणी पुणे पोलिसांनी न्यायालयाला विनंती अर्ज केला आहे की हा गुन्हा गंभीर असल्याने अल्पवयीन आरोपीवर सदोष मनुष्यवधाचा गुन्हा दाखल करण्याची परवानगी द्यावी. पोलिसांच्या या अर्जावर कोर्टात सुनावणी झाली. मात्र आरोपी सज्ञान आहे की नाही, हे पोलीस तपासानंतर ठरविणार आहेत.
बिल्डर विशाल अगरवाल याला तीन दिवसांची पोलीस कोठडी
पुण्यातील कल्याणीनगरमध्ये झालेल्या अपघात प्रकरणातील अल्पवयीन मुलाचा बिल्डर बाप विशाल अगरवाल याला पुणे सत्र न्यायालयाने तीन दिवसांची पोलीस कोठडी सुनावली आहे. अगरवाल याच्यासहित तिघांना २४ मे पर्यंत पोलीस कोठडी सुनावण्यात आली आहे. सरकारी पक्षाकडून विशाल अगरवाल याच्या सात दिवसांची पोलीस कोठडीची मागणी करण्यात आली होती. अगरवाल याने अपघानंतर कोणाकोणाला फोन केले? त्याचे छत्रपती नगरला जाण्याचे कारण काय? त्याला तिथे कुणाला भेटायचे होते? अशा आणि अन्य तपासासाठी सात दिवसांची पोलीस कोठडी द्या, अशी मागणी सरकारी पक्षाने पुणे सत्र न्यायालयाला केली. मात्र न्यायालयाने अगरवाल याला तीन दिवसांची पोलीस कोठडी दिली.
अल्पवयीन आरोपीची ब्लड टेस्ट ही घटनेच्या १५ तासांनी करण्यात आली होती. त्यामुळे त्याच्या रक्तात मद्याचे प्रमाण सापडले नाही अशी माहिती आहे. पण, पोलिसांनी मिळवलेल्या सीसीटीव्ही फुटेज, पबचं बिल आणि प्रत्यक्षदर्शीच्या जबाबावरुन अल्पवयीन आरोपीने मद्यप्राशन केल्याचं कळून येतं. पण, ते कोर्टात सिद्ध करणे हे आव्हानात्मक ठरेल.