सांताक्रूझ येथे गुरुवारी ३४.९ अंश सेल्सिअस कमाल तापमान नोंदवले गेले. तर कुलाबा येथे ३२.४ अंश सेल्सिअस कमाल तापमान होते. पहाटेच्या सुमारास मुंबईत अधिक आर्द्रता होती. दुपारनंतर आर्द्रतेचे प्रमाण कमी असल्याने वर्तवलेल्या अंदाजाइतका त्रास मुंबईकरांना झाला नाही. मात्र गुरुवारी वर्तवलेल्या पूर्वानुमानानुसार आता मुंबईसह उत्तर कोकणात येत्या ४ ते ५ दिवसांमध्ये २ ते ४ अंश सेल्सिअस तापमान वाढू शकते. वीकेण्डला हे तापमान ३८ ते ३९ अंशांवर पोहोचू शकेल. सध्या मुंबईत विक्रोळी ते मुलुंडदरम्यान काही ठिकाणी खूपच उष्णता जाणवत आहे. या भागात आठवड्याच्या अखेरीस उन्हाचा ताप आणखी वाढू शकतो. रायगड आणि ठाणे जिल्ह्यात तुरळक ठिकाणी २७ ते २९ एप्रिलदरम्यान उष्णतेची लाट येण्याची शक्यता आहे.
मुंबईमध्ये २८ आणि २९ एप्रिल रोजी उष्णतेच्या लाटेची शक्यता आहे. तर, पालघर जिल्ह्यात २८ एप्रिल रोजी उष्णतेची लाट येऊ शकते. २८ एप्रिल रोजी दक्षिण कोकणातही तुरळक ठिकाणी उष्णतेच्या लाटेची शक्यता आहे. २८ एप्रिल रोजी चक्रीय वातविरोधी परिस्थिती निर्माण होण्याचा अंदाज आहे. या प्रणालीचे केंद्र जिथे असते त्या भागात अधिक उष्णता जाणवते. हे केंद्र पूर्व उपनगरे, ठाणे आणि पनवेल अशा भागांवर असल्याने या भागात तापमानाचा ताप अधिक जाणवू शकेल, असे प्रादेशिक हवामान विभागाच्या अधिकारी सुषमा नायर यांनी सांगितले. रायगड, ठाणे जिल्ह्यात सध्या ३७ ते ३९ अंशांपर्यंत तापमानाचा पारा पोहोचत असून २७ ते २९ एप्रिलदरम्यान ४० अंशांहून अधिक तापमान नोंदवले जाण्याची शक्यता आहे, असे त्या म्हणाल्या.
तुरळक ठिकाणी पावसाची शक्यता
मध्य महाराष्ट्र आणि मराठवाड्यामध्येही येत्या चार ते पाच दिवसांमध्ये कमाल तापमानात दोन ते चार अंशांनी वाढ होऊ शकते. परंतु या कालावधीत मध्य महाराष्ट्रात तसेच मराठवाड्यातही तुरळक ठिकाणी पाऊस पडण्याची शक्यता वर्तवण्यात आली आहे. विदर्भात शनिवारपर्यंत तुरळक ठिकाणी मेघगर्जनेसह विजांची शक्यता आहे. त्यानंतर वातावरण कोरडे राहू शकेल. भारतीय हवामान विभागाने वर्तवलेल्या पुढील चार आठवड्यांच्या अंदाजानुसार दोन मेपर्यंत कमाल तापमानाचा पारा ४० अंशांपर्यंत चढू शकेल. त्यानंतरच्या आठवड्यात मात्र मराठवाड्याचा काही भाग आणि विदर्भामध्ये याचा ताप अधिक जाणवू शकेल.