काय आहे प्रकरण?
ओशिवरा येथील महिला फॅशन डिझायनर असून तिचा मुलगा अभिनेता आहे. तिने दिलेल्या तक्रारीनुसार, काही वर्षांपूर्वी तिच्या परिचयातील एका व्यक्तीच्या माध्यमातून तिची कामदार नावाच्या व्यवसायिकासोबत ओळख झाली. कामदार यांनी मुंबई शहर व उपनगरांत दूध पुरवठ्याचा व्यवसाय आणखी वाढवायचा असून त्यासाठी काही गुंतवणूकदार पुढे येत आहेत. दरमहा चांगला परतावा मिळत आहे, असे सांगत आपल्यालाही या व्यवसायात गुंतवणूक करण्यास प्रोत्साहित केले, असे तक्रारीत म्हटले आहे. त्यानुसार २०१३पासून या महिलेने गुंतवणूक करण्यास सुरुवात केली. गुंतवणुकीवर परतावा मागितला असता कामदार याने व्यवसायातून झालेला नफा काढून घेण्याऐवजी पुन्हा गुंतवल्यास अधिक फायदा होईल, असेही सांगितले. काही वर्षे सुरळीत गेल्यानंतर त्याने नोटाबंदी, व्यवसायात तोटा अशी कारणे पुढे करून परतावा देण्यास टाळाटाळ केली.
आपली फसवणूक होत असल्याचे लक्षात येताच महिलेने ओशिवरा पोलिस ठाण्यात लेखी तक्रार केली. गुन्हा दाखल होत असल्याचे कळताच कामदार याने पैसे देण्याचे मान्य केले आणि पाच कोटींचा चेक दिला. मात्र खात्यामध्ये पुरेशी रक्कम नसल्याने तो वटला नाही. मूळ रक्कम आणि परतावा मिळून सुमारे आठ कोटी रुपये अडकल्याने महिलेने न्यायालयात धाव घेतली. न्यायालयाने या प्रकरणात गुन्हा दाखल करण्याचे आदेश देताच ओशिवरा पोलिसांनी गुन्हा दाखल केला.