पाचव्या टप्प्यात मुंबईतील सहाही जागांची निवडणूक होणार आहे. महायुतीतील भाजपकडून मुंबईत जाहीर करण्यात आलेल्या दोन जागांमध्ये उत्तर-पूर्व (ईशान्य) मुंबईची जागेचा समावेश होता. भाजपकडून या जागेवर मुलुंडचे विद्यमान आमदार मिहीर कोटेचा यांना उमेदवारी दिली आहे. मार्च महिन्यातच उमेदवारी जाहीर केल्याने कोटेचा यांनी प्रचाराला जोरदार सुरुवात करत संपूर्ण मतदारसंघ पिंजून काढण्यास सुरुवात केली आहे.
गुरुवारी रात्रीच त्यांनी आपण शुक्रवारी सकाळी ९ वाजता उमेदवारी अर्ज भरणार असल्याचे जाहीर केले होते. शुक्रवारी सकाळी मिहीर कोटेचा यांनी अर्ज भरण्यासाठी जाताना जोरदार शक्तिप्रदर्शन केले. यावेळी उपमुख्यमंत्री देवेंद्र फडणवीस, भाजप मुंबई अध्यक्ष आशिष शेलार, विद्यमान खासदार मनोज कोटक, माजी खासदार किरीट सोमय्या यांच्यासह रिपाइंचे अध्यक्ष, केंद्रीय मंत्री रामदास आठवले उपस्थित होते. मात्र, महायुतीतील शिवसेना आणि राष्ट्रवादी काँग्रेस यातील एकही बडा नेता या मिरवणुकीला अथवा उमेदवारी अर्ज भरण्याच्या वेळेस उपस्थित नव्हता. काही दिवसांपूर्वीच शिवसेनाप्रमुख बाळासाहेब ठाकरे यांचा फोटो कोटेचा यांच्या प्रचार सभास्थळी नसल्यावरून शिवसेना नेत्यांनी उघड नाराजी व्यक्त केली होती.
याविषयी मिहीर कोटेचा यांना विचारले असता त्यांनी यावर काहीही बोलण्यास नकार दिला. तर दुसरीकडे भाजप पक्षातील सूत्रांनी मित्रपक्षातील सर्व नेते निवडणूक प्रचारासाठी मुंबईबाहेर असल्याने अर्ज भरण्यास येऊ शकले नाही, असे स्पष्ट केले. मुख्यमंत्री एकनाथ शिंदे, दीपक केसरकर, उदय सामंत हे प्रचारानिमित्त बाहेर आहेत तर उपमुख्यमंत्री अजित पवार हे बारामतीमध्ये तर प्रदेशाध्यक्ष सुनील तटकरे रायगड मतदारसंघात अडकून पडल्याने येऊ शकले नाही, अशीही माहिती एका नेत्याने नाव न छापण्याच्या अटीवर दिली.
दरम्यान, मतदारसंघातील तीन ते चार शिवसेना नगरसेवक या मिरवणुकीत हजर असल्याचेही एका नेत्याने निदर्शनास आणून दिले. मात्र, मित्रपक्षातील प्रमुख नेत्यांच्या गैरहजेरीमुळे उत्तर-पूर्व मुंबई मतदारसंघात भाजप एकटा पडला आहे का, अशी जोरदार चर्चा रंगली आहे.
कोटेचा यांच्या संपत्तीत मोठी घट
कोटेचा हे मुलुंडचे विद्यमान आमदार आहेत. २०१९ च्या तुलनेत त्यांची संपत्ती जवळपास अर्धी झाल्याचे त्यांनी सादर केलेल्या प्रतिज्ञापत्रातून दिसून येते. २०१९मध्ये विधानसभा लढवताना दाखल केलेल्या प्रतिज्ञापत्रानुसार, कोटेचा यांच्याकडे १५.१७ कोटींची जंगम तर ३.४९ कोटींची स्थावर मालमत्ता होती. तसेच त्यांच्यावर १५.६२ कोटी रुपयांचे कर्ज होते. तर त्यांच्या पत्नीकडे ८५ लाख रुपयांची जंगम मालमत्ता होती तर त्यांच्या नावावर कुठलीही जंगम मालमत्ता अथवा कर्ज नव्हते. शुक्रवारी दाखल केलेल्या प्रतिज्ञापत्रानुसार, कोटेचा यांची जंगम मालमत्ता ७.२३ कोटी रुपये, स्थावर मालमत्ता ३.६५ कोटी रुपयांची असून पत्नीच्या जंगम मालमत्तेत किंचित वाढ होऊन ती १.२३ कोटी रुपये आणि २.४३ कोटी रुपयांची स्थावर मालमत्ता आहे. तसेच पत्नीवर आता १.६० कोटी रुपयांचे कर्ज आहे.
कुणी उमेदवार नसेल, तर मी लढतो; फडणवीस सरकारमधील माजी मंत्री सरसावला, कीर्तिकरपुत्रास टक्करRead Latest Maharashtra News Updates And Marathi News
‘सर्वाधिक मताधिक्याने निवडून येतील’
‘मोदींवर मुंबईकरांचे प्रचंड प्रेम आहे आणि यावेळी मोदींना मुंबईतून प्रचंड यश मिळेल. मुंबईतील सहाही जागांवर भाजप-शिवसेना महायुतीचे उमेदवार निवडून येणार आहेत. मिहिर कोटेचा प्रचंड मतांनी निवडून येतील. इथे महविकास आघाडीचे आव्हान दिसून येत नाही. लोकांच्या मनात मोदी आहेत आणि तेच आव्हान महाविकास आघाडी समोर आहे. त्यामुळे कोटेचा मोठ्या मताधिक्याने निवडून येतील’, असा विश्वास यावेळी देवेंद्र फडणवीस यांनी व्यक्त केला.