लोकसभा निवडणुकीच्या निमित्ताने आयोजित ‘मटा कट्टा’मध्ये गुरुवारी अरविंद सावंत सहभागी झाले होते. यावेळी त्यांना विचारलेल्या प्रश्नांची त्यांनी ‘शिवसेना स्टाइल’ उत्तरे दिली. सुरुवातीलाच ‘मराठी माणसाच्या मुंबईतील घसरत्या टक्क्याला शिवसेना जबाबदार नाही का?’ असा प्रश्न सावंत यांना विचारण्यात आला. त्यावर ‘कुणा एकाला यासाठी जबाबदार धरता येणार नाही आणि मराठी माणसाचा मुंबईतील विषय एका मतदारसंघापुरता मर्यादित नाही,’ असे ते म्हणाले.
‘मराठी माणूस व्यवसायाकडे वळत नाही. वादविवादात अधिक वेळ घालवतो. मुंबई सोडून डोंबिवली, कल्याण गाठणे ही पराभूत वृत्ती आहे. पुनर्विकासात प्रत्येक ठिकाणी वाद होतात. आहे त्यापेक्षा मोठे घर मिळणार आहे, यावर आपण समाधानी होत नाही. मोठ्या टॉवरमध्ये घर घेण्यासाठी आपल्या पगारावर कर्ज मिळत नाही. त्यामुळे मराठी माणूस, मराठी अस्मिता याचा सर्व अंगानी विचार व्हायला हवा, केवळ राजकारण करून चालणार नाही.’ असेही सावंत म्हणाले.
‘पेटती मशाल’ या निवडणूक चिन्हाबाबत मतदारांमध्ये बिलकुल संभ्रम नसल्याचे सावंत यावेळी म्हणाले. ‘मशाल चिन्ह मिळाल्यानंतर एक पोटनिवडणूक आम्ही लढलो. समोर उमेदवार देण्यात आला नाही. मात्र आमची निशाणी आता घराघरात पोहोचली आहे,’ असा दावा त्यांनी केला.
सहानुभूतीच्या जोरावर निवडणूक लढवली जात असल्याचा आरोप केला जातो, याकडे तुम्ही कसे पाहता, असे विचारले असता सावंत म्हणाले, ‘आम्ही सहानुभूतीवर, तर मग ते कशावर निवडणूक लढत आहेत, कामाच्या का विद्वेषाच्या? सहानुभूती सहज मिळत नसते. उद्धव ठाकरे यांनी करोनाकाळात लोकांचे जीव वाचविले. त्याचीच ही मंडळी आता बदनामी करीत आहेत. कशी मिळेल त्यांना सहानुभूती?’ असा सवाल सावंत यांनी केला.
‘फक्त मित्र बदलले’
गेल्या निवडणुकीत तुम्हाला भाजपची साथ होती. तुमच्या पक्षात बंड झाले, राष्ट्रवादी काँग्रेस दोन भागात विभागली. त्यामुळे यंदाच्या निवडणुकीकडे तुम्ही कसे पाहता, असे विचारले असता, ‘निवडणूक तीच आहे, तिच्यामध्ये बदल झालेला नाही. फक्त आमचे मित्र बदललेत,’ असे अरविंद सावंत म्हणाले. ‘जे सध्याचे मित्र आहेत ते प्रामाणिकपणे आमच्या सोबत आहेत. देशापुढील गंभीर प्रश्न आहेत, याची जाणीव त्यांना आहे. त्यामुळे हे नवीन मित्र आमच्यासोबत एकदिलाने काम करत आहेत,’ असेही सावंत म्हणाले.
जेल की पक्षबदल, दोनच मार्ग होते, पत्नीलाही गोवल्याने जड अंतःकरणाने निर्णय, नियतीने ही वेळ कुणावर आणू नये, वायकर व्याकुळRead Latest Maharashtra News Updates And Marathi News
‘मोदी निवडणुकांनंतर बदलतात’
‘जिंकेपर्यंतचे मोदी आणि जिकल्यानंतरचे मोदी यांच्यामध्ये खूप फरक आहे आणि हे आम्हाला २०१४ च्या निवडणुकांनंतर वारंवार जाणवले. या निवणुकांमध्ये काँग्रेस जवळपास संपली होती. यानंतर विधानसभा निवडणुकांमध्ये आमच्यासोबत असलेली युती तोडून नरेंद्र मोदी यांनी महाराष्ट्रात तब्बल २७ सभा घेतल्या. काँग्रेस संपली होती. मग या सभा आम्हाला संपविण्यासाठी होत्या का? त्यांना शत प्रतिशत भाजप हवी आहे. २०१९ नंतर अधिकच बदलले. शेतकरी आंदोलनात बळी गेले, पण मोदी भेटायला गेले नाहीत. मणिपूरमध्ये आजही गेले नाहीत. निवडणूक आयुक्त निवड समितीमधून सरन्यायाधीशांनाच काढून टाकले. हा निर्णय घेण्यासाठी १४६ खासदारांना निलंबित करण्यात आले,’ असा आरोप सावंत यांनी केला. ‘ते चीनबद्दल बोलत नाहीत. मोदी कधीच पत्रकार परिषद घेत नाही. नर्मदा आंदोलनात उपोषणाला बसलेले मोदी आणि आताचे संवेदनाहीन मोदी, असे ते बदलत गेले,’ असे सावंत म्हणाले.