मुंबईतील पवई येथे मगरीच्या पिल्लाची तस्करी होत असल्याची माहिती ठाणे वनविभागाला मिळाली होती. तस्करी करणाऱ्या तरुणाला वनविभागाने ताब्यात घेत त्याच्यावर कारवाई केली आणि मगरीच्या पिल्लाची सुटका केली. एक महिन्याच्या या मगराच्या पिल्लाची लांबी ३२ सेंटीमीटर आहे. या तरुणाने हा प्राणी कुठून आणला होता याचा तपास वनविभागाकडून केला जात आहे.
मगर हा प्राणी वन्यजीव संरक्षण अधिनियमानुसार अधिसुची एक मध्ये असल्याने त्याच्या तस्करी प्रकरणी ३ ते ७ वर्षांची शिक्षा आणि २५ हजारांचा दंड अशी कायद्यात तरतूद केली आहे. भारतीय कायद्यांमध्ये देशी आणि परदेशी अशा दोन्ही प्रकारच्या वन्यजीवांच्या संरक्षणाचे व्यापक प्रयत्न केले जात आहेत. परंतु त्याचवेळी पैसे कमवण्याच्या उद्देशाने वन्यप्राण्यांची तस्करी केली जात आहे.
अशा घटना रोखण्यासाठी आणि तस्करी करणाऱ्यांवर लगाम लावण्यासाठी वनविभागाकडून व्यापक उपाय योजना करण्यात येत आहेत, अशी माहिती ठाणे वनविभागाकडून देण्यात आली आहे. या कारवाईमध्ये ठाणे वनविभागाचे उप वनसंरक्षक संतोष सस्ते यांच्या मार्गदर्शनाखाली व सहाय्यक वनसंरक्षक सोनल वळवी, वनक्षेत्रपाल मुंबई राकेश भोईर यांच्यासह मानद वन्यजीव रक्षक ठाणे रोहित मोहिते, वनपाल मुलूंड संदीप यमगर, वनरक्षक भाडूंप मिताली महाले व वनरक्षक राम केंद्रे या कर्मचाऱ्यांनी सहभाग घेतला.