बारामती लोकसभा मतदारसंघातील वातावरण तापत असतानाच दुसरीकडे, उमेदवारांच्या निवडणूक प्रचार यंत्रणेच्या खर्चाचा ताळमेळ लागत नसल्याचे समोर आले आहे. उमेदवारांनी दाखविलेल्या खर्चात आणि निवडणूक निर्णय अधिकाऱ्यांकडील शॅडो रजिस्ट्रर खर्चात तफावत आढळली आहे. त्यामुळेच बारामती लोकसभा मतदारसंघाच्या राष्ट्रवादी काँग्रेस शरदचंद्र पवार पक्षाच्या सुप्रिया सुळे आणि राष्ट्रवादी काँग्रेस पक्षाच्या उमेदवार सुनेत्रा पवार यांना निवडणूक निर्णय अधिकारी कविता द्विवेदी यांनी नोटिसा जारी केली आहे. त्या संदर्भात ४८ तासांत खुलासा करण्याची सूचना करण्यात आली आहे.
बारामती लोकसभा मतदारसंघातील उमेदवारांच्या खर्चाची दुसरी तपासणी काल, बुधवारी झाली. त्यात सर्व ३८ उमेदवारांनी खर्च सादर केला आहे. त्यात राष्ट्रवादीच्या पवार गटाच्या उमेदवार सुप्रिया सुळे यांचा २८ एप्रिलपर्यंतचा ३७ लाख २३ हजार ६१० रुपयांचा खर्च दाखविण्यात आला आहे. मात्र, उमेदवारांच्या खर्च प्रतिनिधीने दाखविलेल्या खर्चाशी निवडणूक अधिकाऱ्यांनी शॅडो रजिस्टरशी तुलना केली. त्यावेळी त्यात एक लाख तीन हजार ४४९ रुपयांची तफावत आढळल्याचे निरीक्षण अधिकाऱ्यांनी नोंदविले. उमेदवाराने दिलेला खर्च खरा आणि योग्य वाटत नसल्याचे नोटिशीमध्ये म्हटले आहे. दरम्यान, उमेदवाराच्या खर्च प्रतिनिधीने ही तफावत अमान्य केली आहे. त्यामुळे येत्या ४८ तासांत खुलासा करण्याची सूचना करण्यात आली आहे.
खर्चातील तफावतीबाबत उमेदवारांना दिलेली नोटीस ही अमान्य असल्यास खर्च निरीक्षकांच्या उपस्थितीत जिल्हा निवडणूक निरीक्षण समितीकडे उमेदवारांना दाद मागता येणार आहे. त्या बैठकीत सुनावणी होऊन निर्णय होईल. त्यात झालेल्या निर्णयानुसार पुढील कार्यवाही करण्यात येईल.
कविता द्विवेदी, निवडणूक निर्णय अधिकारी, बारामती मतदारसंघ
राष्ट्रवादी काँग्रेसच्या उमेदवार सुनेत्रा पवार यांनी २८ एप्रिलपर्यंतचा खर्च २९ लाख ९३ हजार ३१ रुपये इतका झाल्याचे दाखविले आहे. मात्र, खर्च प्रतिनिधीने दाखविलेला खर्च आणि शॅडो रजिस्टरशी तुलना करता हा खर्च जुळत नाही. त्यात नऊ लाख १० हजार ९०१ रुपयांची तफावत आढळल्याचे निरीक्षण नोंदविले आहे. उमेदवाराने दिलेला खर्च हा खरा आणि योग्य वाटत नसल्याने पवार यांना नोटीस बजावण्यात आली आहे. परंतु, ही तफावत उमेदवारांच्या प्रतिनिधीने अमान्य केली आहे. त्यामुळे पवार यांना खुलासा करण्याची सूचना करण्यात आली. खुलासा न आल्यास ही तफावत मान्य असल्याचे समजून ती उमेदवाराच्या खर्चात समाविष्ट करण्यात येईल, असेही त्यात स्पष्ट करण्यात आले आहे.
चार उमेदवारांना नोटिसा बारामती मतदारसंघातील उमेदवारांची खर्चाची पहिली तपासणी २५ एप्रिलला झाली होती. त्यात ३८ पैकी चार उमेदवारांनी खर्च सादर केला नव्हता. त्यामुळे त्यांना नोटिसा जारी करण्यात आल्या होत्या. दुसऱ्या तपासणीपूर्वी खुलासा करण्याचे त्यात म्हटले होते. दुसऱ्या खर्च तपासणीवेळी सर्व उमेदवारांनी खर्च सादर केला आहे.