ठाकरे-सुळेंच्या गप्पा
त्याचं झालं असं की, शिवसेना (उद्धव बाळासाहेब ठाकरे) पक्षाचे प्रमुख आणि माजी मुख्यमंत्री उद्धव ठाकरे आणि राष्ट्रवादी काँग्रेस : शरदचंद्र पवार पक्षाच्या खासदार सुप्रिया सुळे हे अनंत-राधिका यांच्या विवाह सोहळ्यास हजर होते. हे दोघं गप्पा मारत असतानाचा एक व्हिडिओ समोर आला आहे. त्यात दिसतं, की उद्धव ठाकरे आणि सुप्रिया सुळे हे चालत-चालत एकमेकांशी गप्पा मारत आहेत. उद्धव ठाकरे यांनी क्रिम रंगाचा शानदार कुर्ता घातला आहे, तर सुप्रिया सुळे यांनी राणी कलरची पैठणी नेसली आहे.
आदित्य ठाकरेंनी हाक मारली
ठाकरे आणि सुळे चालत असतानाच, अचानक माजी मंत्री आदित्य ठाकरे यांनी मागून वडिलांना आवाज दिला. दोघांमध्ये नेमका काय संवाद झाला, हे ऐकू येत नाही. मात्र उद्धव ठाकरे थांबले आणि मागे वळून येत एका तरुणीशी गप्पा मारु लागले. त्या वेळी सुप्रिया सुळे मात्र जागच्या जागी थांबून राहिल्या.
मनोहर जोशींची नात
ही तरुणी दुसरी तिसरी कुणी नसून अभिनेत्री शर्वरी वाघ आहे. नुकत्याच प्रदर्शित झालेल्या मुंज्या चित्रपटातून तिने प्रेक्षक आणि समीक्षकांची वाहवा मिळवली आहे. मात्र तिची दुसरी ओळख म्हणजे ती महाराष्ट्राचे माजी मुख्यमंत्री आणि नुकतेच निधन झालेले शिवसेना नेते मनोहर जोशी यांची नात आहे. जोशी आणि ठाकरे परिवाराचे कौटुंबिक संबंध आहेत. आदित्य ठाकरे आणि शर्वरी वाघ हे लहानपणापासूनचे मित्र-मैत्रिण असल्याचे बोलले जाते. त्यामुळे साहजिकच आदित्य यांनी वडिलांना हाक मारुन शर्वरीची गाठभेट घडवून आणली.
Anant Radhika Wedding : ट्रेमधून चपला आल्या, ठाकरे पिता-पुत्राने पायात वहाणा सरकवल्या, आकाश अंबानींना भेटून निघाले
शर्वरी-सुप्रियांचाही संवाद
दोघांमध्ये जेमतेम काही सेकंदाचा संवाद होतो, तोच शर्वरीचं लक्ष सुप्रिया सुळेंकडे जातं आणि ती नम्रपणे त्यांच्याशीही बोलायला जाते. त्याचवेळी अभिनेता अर्जुन कपूर हा उद्धव ठाकरेंना नमस्कार करताना दिसतो. हा वार्तालाप संपताच उद्धव ठाकरे निघाले आणि मागे आदित्य ठाकरे-शर्वरी वाघ यांनीही एकमेकांना मिठी मारत निरोप घेतला.