बदमाश फुटीर गद्दारांना आम्ही ओळखलंय, असा धडा शिकवू, पुन्हा हिम्मत करणार नाही, नाना संतापले

मुंबई : मागील निवडणुकीत चंद्रकांत हंडोरे उभे होते, त्यावेळी काही गद्दारांनी पक्षविरोधी काम केले होते. यावेळीही काही बदमाश फुटीर गद्दारांनी पक्षशिस्तीचा भंग करून पक्षाच्या आदेशाच्या विरोधात जाऊन काम केले आहे. ते लोक कोण आहेत, ते आम्ही ओळखले असून त्यांची नावे आम्ही पक्षश्रेष्ठींना पाठवली आहेत. यावेळीही कमिटी वगैरे काही नाही. फुटीरांना असा धडा शिकवू की त्यांनी पुन्हा अशी हिम्मत करता कामा नये, त्यांना घरचा रस्ता दाखविण्यात येईल, अशी संतापजनक आणि आक्रमक प्रतिक्रिया काँग्रेस प्रदेशाध्यक्ष नाना पटोले यांनी दिली.द्वैवार्षिक विधान परिषद निवडणुकीत निकालांतून काँग्रेस पक्षाची आठ मते फुटल्याचे समोर आले आहे. मागील निवडणुकीवेळीही काँग्रेस पक्षाची मते फुटली होती. यंदाही त्याचीच पुनरावृत्ती झाल्याने पक्षावर मोठी नामुष्की ओढावली. याच पार्श्वभूमीवर निवडणूक निकालानंतर काँग्रेस प्रदेशाध्यक्ष नाना पटोले, विरोधी पक्षनेते विजय वडेट्टीवार, माजी मुख्यमंत्री तथा ज्येष्ठ नेते पृथ्वीराज चव्हाण आदी नेत्यांनी प्रसार माध्यमांशी संवाद साधला. अतिशय आक्रमक अंदाजात सगळ्यात नेत्यांनी फुटीर आमदारांविषयी भाष्य केले.
MLC Election Results 2024: काँग्रेसचा पुन्हा गेम, मते फुटल्याची चर्चा, महायुतीचा विजयी झेंडा, मविआला धक्का!

त्यांना असा धडा शिकवू की पुन्हा अशी हिम्मत करणार नाही!

भारतीय जनता पक्ष आज आसुरी आनंद साजरा करत आहेत, त्यांनी तो जरूर करावा पण महाराष्ट्राची जनता विधानसभा निवडणुकीची वाट पाहतीये. शरद पवार आणि उद्धव ठाकरे यांचा पक्ष भाजपने फोडला. फोडाफोडी ही भाजपची परंपरा राहिलेली आहे. विधान परिषद निवडणुकीत काँग्रेस आमदार फुटले हे उघड आहे, मात्र त्यांना असा धडा शिकवू की पुन्हा ते अशी हिम्मत करणार नाही, असे पटोले म्हणाले.
पंकजा मुंडे यांच्या खांद्यावर ५ वर्षांनी गुलाल पडला, राजकीय वनवास अखेर संपला!

मागे बदमाशांना ओळखले नव्हते, आता तेच फुटीर ट्रॅपमध्ये अडकले!

पटोले म्हणाले, “मागील निवडणुकीत चंद्रकांत हंडोरे उभे होते, त्यावेळीही आमदार फुटीचा प्रकार झाला. त्यावेळी बदमाष लोकांना आम्ही ओळखू शकलो नव्हतो. मात्र यंदा संशयी लोकांवर आम्ही ट्रॅप लावला होता. त्या ट्रॅपमध्ये बदमाश लोक सापडले आहेत. वरिष्ठांना आम्ही त्यांची नावे कळवली आहेत. ज्यांनी पक्षाशी बेईमानी आणि गद्दारी केली त्यांना बाहेरचा रस्ता दाखविण्यात येईल, आम्ही पक्षश्रेष्ठींना दोन दिवसांत अहवाल सादर करू”
शेकापच्या जयंत पाटील यांचा पराभव कसा झाला? कुणी केला? १२ मतांच्या ४ शक्यता

कमिटी वगैरे काही नाही, गद्दारांना थेट बाहेरचा रस्ता दाखवणार!

फुटीर आमदारांवर कारवाई करण्यासाठी मागील वेळी कमिटी नेमली होती, परंतु कारवाई झालेली नव्हती. आताही तसाच काही प्रकार होईल का? असे नाना पटोले यांना विचारले असता, यावेळी कमिटी वगैरे काही नाही, गद्दारांना थेट बाहेरचा रस्ता दाखवणार, असे बेधडकपणे त्यांनी सांगितले.