ईशान्य मुंबई लोकसभा मतदारसंघातून एकूण संजय पाटील नावाच्या एकूण ५ उमेदवारांनी अर्ज भरला. यातील एक मविआचे उमेदवार आहेत. ते ठाकरेसेनेकडून रिंगणात आहेत. तर अन्य चार संजय पाटलांपैकी तिघे सांगलीचे, तर एक जण मानखुर्दचा आहे. विशेष म्हणजे या चौघांनीदेखील एकाच व्हेंडरकडून एकाच दिवशी स्टॅम्प पेपर खरेदी केले आहेत. आता चारही जण ‘नॉट रिचेबल’ आहेत.
पाचवी, नववी आणि बी.ए. पास असलेल्या उमेदवारांच्या बँक खात्यात कुठे ११ रुपये, कुठे ५ हजार तर कुठे १० हजार रुपये असल्याचं समोर आलं आहे. या सर्वांच्या हाती एक ते सव्वा लाखाची रोकड असल्याचं त्यांच्या प्रतिज्ञापत्रांवरुन समोर आलं आहे. चौघांपैकी संजय निवृत्ती पाटील, संजय महादेव पाटील आणि संजय पांडुरंग पाटील हे तिघे सांगलीच्या शिराळा विधानसभा मतदारसंघातले असून संजय बंडू पाटील हे मूळचे सातारचे आहेत. ते सध्या मानखुर्दमधील शिवाजीनगरात राहतात.
दानवे दुसऱ्यांदा खोतकरांच्या भेटीला; दोघांचा एका कारमधून प्रवास; जालन्यात महायुती सुस्साट?
चार संजय पाटील यांच्यामागे नेमकं कोण आहे त्याचा शोध घेतला जात आहे. चौघांनीही नवी मुंबईतील नीलेश भोजने यांच्याकडून २९ एप्रिलला स्टॅम्प पेपर खरेदी केल्याची माहिती समोर आली आहे. चार संजय पाटलांपैकी संजय बंडू पाटील (नॅशनल्स पीपल्स पार्टी) आणि संजय निवृत्ती पाटील (अपक्ष) यांचे अर्ज मंजूर झाले आहेत. अन्य दोघांचे अर्ज बाद झाले आहेत.
ईशान्य मुंबईत ‘रायगड पॅटर्न’?
नामसाधर्म्य असलेला उमेदवार उभा करुन विरोधी पक्षाच्या उमेदवाराला अडचणीत आणण्याची खेळी रायगड लोकसभा मतदारसंघात अनेकदा पाहायला मिळाली आहे. २०१४ मध्ये याचा फटका राष्ट्रवादी काँग्रेसच्या सुनिल तटकरेंनी बसला. त्या निवडणुकीत शिवसेनेचे अनंत गीते विरुद्ध राष्ट्रवादी काँग्रेसचे सुनिल तटकरे असा सामना झाला. याच निवडणुकीत सुनिल तटकरे नावाचा एक अपक्ष उमेदवार होता. त्याला ९ हजार ८४९ मतं मिळाली होती. या निवडणुकीत राष्ट्रवादीच्या तटकरेंचा २ हजार ११० मतांनी पराभव झाला होता.