‘वंचित आघाडीने एक-दोन आमदार निवडून आणले असले तरी हवे तसे यश नाही. त्यांनी मागच्या लोकसभा निवडणुकीत ४३ लाख मते मिळवूनही एकही उमेदवार निवडून येऊ शकला नाही. त्यामुळे अशा राजकारणाचा फायदा ना त्यांना आहे, ना समाजाला. शिवाय त्यांच्यासोबत येणारे केवळ निवडणुकीपुरते एकत्र येतात. ते आणि मी एकत्र आलो तर समाजाची व रिपाइंची मोठी ताकद उभी राहू शकते आणि सत्ताही मिळू शकते’, असे मत वंचितच्या प्रयोगाबाबतच्या उत्तरात आठवले यांनी व्यक्त केले. ‘१९९०मध्ये आमचा ऐक्याचा प्रयोग झाला होता. त्यावेळी युती करण्याबाबत आमचा जाहीरनामा मान्य करणाऱ्या काँग्रेस व जनता दल या दोघांपैकी एकाची निवड करताना झालेल्या मतदानात आमच्या सुकाणू समितीमधील ३३ जणांपैकी २३ जणांनी काँग्रेसच्या बाजूने कौल दिला होता. तरीही प्रकाश आंबेडकर यांनी ते मान्य केले नाही’, अशी आठवणही आठवले यांनी यावेळी सांगितली.
‘राज्यघटना बदलणे हा अपप्रचार’
‘पंतप्रधान नरेंद्र मोदी यांनी सुरुवातीपासूनच सबका साथ, सबका विकास, ही भूमिका घेतलेली आहे. चारशे पार झाल्यास संविधान बदलू वगैरे वक्तव्ये भाजपच्या काही नेत्यांनी व्यक्तिगत पातळीवर केली असली तरी त्यात कोणतेही तथ्य नाही. गोळवलकर यांच्या पुस्तकात राज्यघटनेविषयी काही म्हटले असले तरी ती आज भाजपची भूमिका नाही. त्यामुळे राज्यघटना बदलली जाणार, लोकशाही धोक्यात, हा भाजपविषयी निव्वळ अपप्रचार आहे. मोदींना बौद्ध धर्माविषयी खूप आस्था आहे. डॉ. बाबासाहेब आंबेडकर यांच्या मुंबईतील नियोजित स्मारकाचे कामही मुख्यत्वे मोदी सरकारच्याच काळात मार्गी लागले आहे’, असा दावा आठवले यांनी केला.
‘एनडीए कामाच्या जोरावर चारशेपार’
‘मोदी सरकारने दहा वर्षांत अत्यंत भरीव काम केले आहे आणि देशाचा विकास झपाट्याने केला आहे. त्यामुळे त्याच्या बळावरच दक्षिण भारत, ईशान्य भारतासह संपूर्ण देशभरातून राष्ट्रीय लोकशाही आघाडीला चारशेपार जागा मिळतील’, असा विश्वास आठवले यांनी व्यक्त केला.
Nashik Lok Sabha : अजितदादांचा फोन आणि कोकाटे नरमले, गोडसेंबाबत कडवटपणा दूर, माणिकराव महायुतीच्या प्रचारात
‘तर शिवसेनेची फाटाफूट झाली नसती’
‘नरेंद्र मोदी नेहमीच भाषणात म्हणायचे, दिल्लीत नरेंद्र आणि महाराष्ट्रात देवेंद्र. मग अमित शहांनी अडीच वर्षे मुख्यमंत्रिपदाचे आश्वासन दिल्याचा उद्धव ठाकरेंचा दावा असेल तर त्यांनी तेव्हाच तसे स्पष्ट आश्वासन घेऊन जाहीर का केले नव्हते? त्यामुळे नंतर मुख्यमंत्रिपदावर दावा करून उद्धव यांनी भूमिका घेतली नसती तर त्यांच्या पक्षाची फाटाफूट टळली असती. त्यांनी भाजपसोबत काडीमोड घेऊन चूक केली. लहान पक्षांना संपवण्याचा भाजपचा डाव असल्याच्या त्यांच्या आरोपातही तथ्य नाही. कारण माझा पक्ष ईशान्य भारतातही वाढत आहे’, असेही आठवले यावेळी म्हणाले.
Read Latest Maharashtra News Updates And Marathi News
‘आमच्या नाराजीचा विचार होईल’
‘आम्हाला निर्णयप्रक्रियेत सहभागी करून घेतले जात नाही, हे खरे आहे. राज्य मंत्रिमंडळाच्या पहिल्या विस्तारात आम्हाला मंत्री पदाचे आश्वासन होते. परंतु, ते बाजूला राहून अजितदादांचा सत्तेत सहभाग झाला. त्यामुळे आमच्या लहान पक्षाच्या नाराजीचा मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार विचार करतील. कारण मी जिथे जातो, तिथे त्यांना सत्ता मिळते’, असेही आठवले यांनी आवर्जून नमूद केले.