प्रशिक्षणार्थी सनदी अधिकारी पूजा खेडकर यांची आई मनोरमा खेडकर यांनी मुळशीमध्ये शेतीच्या वादातून स्थानिक शेतकऱ्यांना पिस्तुलाचा धाक दाखवून धमकावल्याचा आरोप करणारा व्हिडीओ समोर आला. त्यामध्ये हातात छोटे पिस्तूल घेऊन बाउन्सरच्या मदतीने शेतकऱ्यांना धमकावताना मनोरमा खेडकर दिसत असल्याचा दावा करण्यात आला. पुणे ग्रामीण पोलिसांनी या व्हिडीओची सत्यता पडताळली असून, याप्रकरणी गुन्हा दाखल केला आहे.
मनोरमा खेडकर यांच्याकडून प्रतिसाद नाही
पुणे पोलिसांच्या नोटिसीला मनोरमा खेडकर यांनी कोणताही प्रतिसाद दिलेला नाही. त्यामुळे पुणे पोलिसांनी पुण्यातील बाणेर रोडवरील खेडकर यांच्या बंगल्याच्या प्रवेशद्वाराच्या भिंतीवर नोटीस लावली आहे. नोटीस देण्यासाठी आम्ही त्यांना संपर्क केला परंतु त्यांच्याकडून कोणताही प्रतिसाद मिळत नाही, असे पुणे पोलिसांनी माध्यमांशी बोलताना सांगितले.
ऑडीवर लाल दिवा, आईच्या हातात बंदूक, आरोपांनंतर पहिल्यांदाच IAS पूजा खेडकर माध्यमांसमोर
जमिनीसाठी पोलिसांवर दबाव
खेडकर कुटुंबाची मुळशीत सुमारे २५ एकर जमीन आहे. या जमिनीच्या खरेदीवेळी शेतकऱ्यांच्या जागेवर अतिक्रमण करण्याचा प्रयत्न केल्याचा खेडकर कुटुंबावर आरोप आहे. याच प्रकरणात खेडकर कुटुंबाने पोलिसांवर दबाव टाकल्याचे पुणे ग्रामीण जिल्हा पोलिस अधीक्षकांच्या अहवालात म्हटले आहे.
खेडकरांच्या जमिनीचे बारामती कनेक्शन
खेडकर कुटुंबाची मुळशी तालुक्यात जमीन असल्याचे समोर आल्यानंतर कुटुंबीय वादाच्या भोवऱ्यात चांगलेच अडकले. त्याचवेळी त्यांनी घेतलेल्या जमिनीचे बारामती कनेक्शनच असल्याचे समोर आले.बारामतीमधील वाघळवाडी येथे गट क्रमांक आठमध्ये स्थानिक रहिवाशांच्या जमिनी आहेत. त्याच ठिकाणी दिलीप कोंडिबा खेडकर यांनी १४ वर्षांपूर्वी १४ गुंठे जमीन खरेदी केली आहे. त्याचा ७/१२ उपलब्ध झाला आहे.