पुणे जिल्हाधिकारी कार्यालयात पूजा खेडकर या प्रशिक्षणार्थी सनदी अधिकारी म्हणून नियुक्तीस होत्या. मात्र, त्यांच्या अनेक कारनाम्यांमुळे त्या वादात अडकल्या. त्यानंतर राज्य सरकारने त्यांची वाशिम आणि अकोला जिल्ह्यात बदली केली. सनदी अधिकारीपदी निवड होण्यासाठी त्यांनी केंद्रीय लोकसेवा आयोगाला सादर केलेले दिव्यांग प्रमाणपत्र खोटे असल्याचा आरोप करण्यात येत आहे.
पूजा खेडकर प्रकरणात पुणे पोलिस राज्य सरकारला अहवाल सादर करणार आहेत. त्यात पूजा खेडकर यांनी जिल्हाधिकारी कार्यालयात अँटी चेंबर मिळवण्यासाठीची कृती, त्यांच्या वडिलांकडून तेथील अधिकाऱ्यांवर टाकण्यात आलेला दबाव, आई मनोरमा यांचे मुळशी येथील पिस्तूल प्रकरण, ग्रामीण पोलिसांनी दाखल केलेला गुन्हा, खासगी कारवर लावलेला अंबर दिवा आणि दिव्यांग प्रमाणपत्र आणि इतर बाबी यांचा अहवालात समावेश असेल.
ऑडीवर लाल दिवा, आईच्या हातात बंदूक, आरोपांनंतर पहिल्यांदाच IAS पूजा खेडकर माध्यमांसमोर
दरम्यान, पूजा खेडकर यांनी सादर केलेले प्रमाणपत्र कोणी दिले, कोणत्या जिल्ह्यातून मिळवले आणि त्यांची वैद्यकीय तपासणी कोणत्या डॉक्टर व रुग्णालयातून झाली, या बाबी देखील तपासल्या जाणार आहेत. खेडकर यांनी दृष्टीदोष, मानसिक आजारासह अन्य एका प्रवर्गातील दिव्यांग प्रमाणपत्र सादर केले असल्याची चर्चा आहे.पूजा खेडकरांचे संपूर्ण कुटुंब भ्रष्टाचारी, त्यांच्यावर फौजदारी गुन्हे दाखल करा, रवींद्र धंगेकर आक्रमक
चौकशी समितीसमोरच म्हणणे मांडणार
केंद्र सरकारच्या चौकशी समितीसमोर माझे म्हणणे मांडेन, असे प्रशिक्षणार्थी आयएएस अधिकारी पूजा खेडकर यांनी स्पष्ट केले. वाशीम येथील नियोजन भवन परिसरात त्यांनी पत्रकारांशी संवाद साधला.
केंद्र सरकारने गुरुवारी खेडकर प्रकरणाच्या चौकशीसाठी समिती स्थापन केली आहे. यासंदर्भात दोन आठवड्यात अहवाल देण्याचे निर्देश समितीला दिले आहे. या अनुषंगाने त्यांना पत्रकारांकडून विचारणा करण्यात आली. सोबतच दिव्यांग प्रमाणपत्र, नॉन क्रिमिलेअर, ऑडी प्रकरणावरही प्रश्न केले गेले. पण, त्यांनी कुठल्याही प्रश्नाला उत्तर देण्याचे टाळले. आपल्याला बोलण्याची परवानगी नसल्याचे सांगितले.