पुणे लोकसभेत शेवटचा तास ‘बदलाचा’, नऊ टक्के मतं ठरवणार विजयाची समीकरणं, गणित काय?

पुणे : पुणे लोकसभा मतदारसंघात मतदानाच्या दिवशी शेवटच्या तासाभरात झालेले सुमारे एक लाख मतदान (नऊ टक्के) विजयाची समीकरणे ठरवणारे असेल, अशी शक्यता राजकीय वर्तुळातून व्यक्त करण्यात येत आहे. शेवटच्या तासाभरात मतदानाची टक्केवारी वाढली असली, तरी दुपारी एकपर्यंत झालेल्या मतदानाच्या जवळपास निम्मे मतदान पार पडले असल्याने निकालातील चुरस अधिकच वाढल्याची चिन्हेही या आकडेवारीतून दिसू लागली आहे.

पुण्यात दुपारपर्यंतच्या टप्प्यात सोसायटी भागातील मतदारांनी मतदान केंद्रांवर रांगा लावल्याचे चित्र दिसत होते. वस्ती भागातील मतदारांनी शेवटच्या तासाभरात मतदान केंद्रांवर मोठ्या प्रमाणात रांगा लावल्या होत्या. हा आकडाही लक्षणीय असल्याने ‘मतदानाचा पॅटर्न’ राजकीय पंडितांनाही चक्रावून टाकणारा आहे.

इतर पक्षांचे मतदान निर्णायक?

पुण्यात भारतीय जनता पक्षाचे उमेदवार मुरलीधर मोहोळ आणि काँग्रेसचे उमेदवार रवींद्र धंगेकर या दोन उमेदवारांत प्रामुख्याने लढत झाली; तरीही वंचित बहुजन आघाडीचे उमेदवार वसंत मोरे आणि ‘एमआयएम’चे अनिस सुंडके प्रामुख्याने किती मते घेणार, यावर काँग्रेसच्या उमेदवाराचे भवितव्य ठरणार आहे. प्रचारातील सूर पाहता पुण्यातील निवडणूक एकास एक झाली असल्याने ‘वंचित’ आणि ‘एमआयएम’ला फारसे मतदान पडेल, अशी शक्यता कमी असल्याची चर्चा राजकीय वर्तुळात आहे.

‘कँटोन्मेंट’, ‘कसबा पेठ’ चर्चेत

पुणे लोकसभा मतदारसंघातील सहा विधानसभा मतदारसंघातील कसबा पेठ आणि कँटोन्मेंट विधानसभा मतदारसंघात शेवटच्या तासाभरात जवळपास २६ हजार मतदान झाले आहे. ‘कँटोन्मेंट’मध्ये काँग्रेसचा प्रभाव सर्वाधिक राहील, अशी चर्चा आहे. कसबा पेठ मतदारसंघाचे आमदार काँग्रेसचे उमेदवार असल्याने येथे किती मताधिक्य मिळणार, यावर काँग्रेसच्या विजयाचे गणित अवलंबून राहील, अशी शक्यता वर्तविण्यात येत आहे.

वडगाव शेरीत मतदानात वाढ

वडगाव शेरी विधानसभा मतदारसंघात शेवटच्या तास-दीडतासात २७ हजार मतदान वाढले आहे. हे वाढलेले मतदान भाजपची डोकेदुखी वाढविणारे ठरू शकते. या मतदारसंघात २०१९च्या तुलनेत जवळपास ३६ हजार मतांमध्ये वाढ झाली. यात नवमतदारांची संख्याही लक्षणीय असल्याने वडगाव शेरी मतदारसंघ विजयाचा ‘ट्रेंड’ निश्चित करणारा आहे. गेल्या लोकसभेच्या निवडणुकीत भाजपला येथून मोठे मताधिक्य मिळाले असले, तरी विधानसभेच्या निवडणुकीत पराभव झाला होता. त्यामुळे वडगाव शेरीचे मताधिक्य ज्या उमेदवाराला त्याचा विजय निश्चित, असे समीकरण राहणार असल्याची चर्चा आहे.
Uddhav Thackeray : मोदींच्या डोक्यावर छत्रपती शिवरायांचा जिरेटोप, ठाकरे संतापले; प्रफुल्लभाई लाचारी किती करावी?

‘कोथरूड’ भाजपचा बालेकिल्ला?

कोथरूड विधानसभा मतदारसंघ हा कायमच भाजपचा बालेकिल्ला राहिला आहे. या ठिकाणी गेल्या निवडणुकीच्या तुलनेत १७ हजार मतांनी वाढ झाली आहे. त्याच वेळी या मतदारसंघातील सुमारे ३० हजार मतदारांची कमी झालेली नावे ही भाजपसाठी डोकेदुखी ठरणारी असेल, अशी शक्यता आहे. या मतदारसंघात भाजपला मिळणारे अधिकाधिक मताधिक्य भाजपच्या विजयाची नांदी ठरते. त्यामुळे हे मताधिक्य कमी करण्यासाठी काँग्रेसने केलेले प्रयत्न कितपत यशस्वी होतात, यावर दोन्ही उमेदवारांचे भवितव्य ठरणार आहे.
Praful Patel : मोदींना शिवरायांचा जिरेटोप, सोशल मीडियावरील संतापानंतर पटेल नरमले, म्हणाले, यापुढे काळजी घेऊ
Read Latest Maharashtra News Updates And Marathi News

मतदानाचा पॅटर्न (टक्केवारीत)