गॅसपुरवठा खंडित करण्याचा इशारा
अर्धवेळ नोकरी, गुंतवणुकीवर चांगल्या परतावा, कुरिअर फ्रॉड किंवा पोलिस कारवाईची भीती घालून सायबर चोरटे नागरिकांची फसवणूक करतात. दररोज अशा असंख्य घटना घडतात. गेल्या काही महिन्यांत सायबर चोरट्यांनी फसवणुकीसाठी ‘एमएनजीएल’ हे माध्यम निवडले आहे. ‘एमएनजीएल’चा लोगो असलेल्या मोबाइल क्रमांकावरून व्हॉट्सअॅपला मेसेज केला जातो. त्यामध्ये ‘बिल न भरल्यास रात्री साडेनऊ वाजता गॅस पुरवठा बंद केला जाईल. बिल भरण्यासाठी खालील क्रमांकावर संपर्क साधा,’ असा मजकूर असतो. गॅस पुरवठा खंडित होऊ नये, यासाठी अनेक जण बिल भरले आहे, हे सांगण्यासाठीदेखील संबंधित क्रमांकावर संपर्क साधतात आणि सायबर चोरटे त्यांना बोलण्यात गुंतवून त्यांची फसवणूक करतात.
माहिती ‘फुटल्या’ची शंका
पुणे आणि पिंपरी-चिंचवडमध्ये ‘एमएनजीएल’चे सुमारे दीड लाख पाइप गॅसधारक आहेत. ‘एमएनजीएल’च्या बिलाचे संदेश ग्राहक नसलेल्या व्यक्तींना अपवाद वगळता पाठविले जात नाहीत. बिल भरण्याचे आवाहन करणारे हे बोगस संदेश सोसायट्यांमधील ‘एमएनजीएल’ ग्राहकांना पाठविण्यात आले आहेत. नरवीर तानाजी मालुसरे रस्ता परिसर, वडगाव बुद्रुक, धायरी, कोथरूड, पौड रस्ता, बाणेर आणि कात्रज येथील काही सोसायट्यांतील बहुतेक सर्व फ्लॅटधारकांना संदेश प्राप्त झाले आहेत.
यापूर्वीही घडल्या फसवणुकीच्या घटना
२६ मे : ‘एमएनजीएल’चे बिल भरायला सांगून उजव्या भुसारी कॉलनीत राहणाऱ्या महिलेची एक लाख ९८ हजार रुपयांची फसवणूक.
१६ जून : पिंपरी पोलिस ठाण्याच्या हद्दीत वृद्ध व्यक्तीची दोन लाख ९४ हजार रुपयांची फसवणूक.
१७ जून : पौड रस्त्यावरील एका ज्येष्ठ नागरिकाच्या खात्यातून दीड लाख रुपये काढून घेण्यात आले.
फसवणूक नेमकी होते कशी?
– सायबर चोरट्यांनी सुरुवातीला ‘एमएनजीएल’ ग्राहकांना फोन करून बिल भरायला सांगितले. त्या वेळी एक लिंक पाठवून त्यात माहिती भरण्यास सांगून फसवणूक केली.
– आता सायबर चोरटे ग्राहकांना ‘व्हॉट्सअॅप’वर संदेश पाठवतात. त्यामध्ये थकलेले बिल भरण्यासाठी संदेशात नमूद मोबाइल क्रमांकावर संपर्क साधण्यास सांगतात.
– ग्राहकाने त्या क्रमांकावर फोन केल्यानंतर सायबर चोरटे बिल भरण्याची प्रक्रिया करायला सांगून खात्यातून पैसे काढून घेतात.
– अनेक ग्राहक त्या क्रमांकावर फोन करून बिल भरले आहे, असे सांगतात. मात्र, सायबर चोरटे ‘पेमेंट व्हेरिफाय’ करण्याच्या बहाण्याने बँक खात्याची माहिती घेऊन फसवणूक करतात.
यापूर्वी सायबर चोरट्यांनी वीजबिल भरण्यासंदर्भातील खोटे संदेश पाठवून फसवणक करण्याचा प्रयत्न केला आहे. त्याच ग्राहकांना सायबर चोरट्यांनी ‘एमएनजीएल’च्या नावे हे खोटे संदेश पाठविण्यात आल्याची शक्यता आहे. ‘एमएनजीएल’ची गॅसजोडणी असणाऱ्या सोसायट्या शोधून तेथील रहिवाशांना संदेश पाठविण्यात येत असण्याचीही शक्यता नाकारता येत नाही. या प्रकारांबाबत पुणे आणि पिंपरी-चिंचवड पोलिसांशी पत्रव्यवहार केला आहे.- आनंद जैन, बिल विभागप्रमुख, ‘एमएनजीएल’
सायबर चोरट्यांकडून पाठविण्यात येणाऱ्या खोट्या संदेशांमध्ये ‘एमएनजीएल’च्या लोगोचा वापर केला आहे. त्यामुळे ‘एमएनजीएल’नेदेखील पोलिसांत गुन्हा दाखल करणे अपेक्षित आहे. ग्राहकांची ही माहिती नेमकी कुठून ‘फुटली’ हेदेखील तपासण्याची गरज आहे.- बापू भावे ‘एमएनजीएल’ ग्राहक