ट्रक अडकला, वाहतुकीला अडथळा, मोठी दुर्घटना टळली
सिंहगड रस्ता परिसरातील धायरी फाटा येथे हा अपघात घडला. याच परिसरात दोन मोठ्या शाळा आहेत. या ठिकाणावरून शाळकरी विद्यार्थ्यांची स्कूल बस, व्हॅनने अथवा पायी मोठ्या प्रमाणात ये-जा सुरू असते. काही दिवसांपूर्वी त्या ठिकाणच्या रस्त्याचे काम करण्यात आले होते. मात्र त्याठिकाणी असलेले चेंबर देखील मातीचा भराव टाकून त्यावर डांबरीकरण करण्यात आले आहे. यानंतर शुक्रवारी भल्या पहाटे तिथल्या रस्त्यावरून सिमेंटची पोती घेऊन निघालेल्या ट्रकचे चाक तेथील रस्त्यात रुतले. यामुळे ट्रक एका बाजूला झुकून तिथेच अडकून पडला होता. अखेर क्रेनच्या साहाय्याने हा रुतलेला ट्रक त्या ठिकाणावरून काढण्यात आला. तोपर्यंत या मार्गावर रहदारीला अडथळा निर्माण झाला होता.
पुण्यात नऊ बेकायदा होर्डिंगवर कारवाई; धोकादायक ७२ फलकांना नोटिसा
चेंबर सुस्थितीत ठेवण्याऐवजी भराव टाकून डांबरीकरण करणे कितपत योग्य?
अपघातावेळी त्याठिकाणी जर एखादी स्कूलबस असती, अथवा ट्रक पलटी झाला असता आणि बाजूला नागरिक असते तर मोठी दुर्घटना घडण्याची शक्यता नाकारण्यात येत नाही. रस्त्यांचे काम करताना तेथील चेंबर सुस्थितीत ठेवण्याकडे ठेकेदारासह प्रशासनाकडून डोळेझाक केली जाते. चेंबर सुस्थितीत ठेवण्याऐवजी ते त्यात भराव टाकून त्यावर डांबरीकरण करणे कितपत योग्य आहे, याबाबत आता नागरिक प्रश्न विचारत आहेत.