मुंबई उपनगर जिल्हा निवडणूक कार्यालयाअंतर्गत मुंबई उत्तर, मुंबई उत्तर पश्चिम, मुंबई उत्तर मध्य व मुंबई उत्तर पूर्व हे चार लोकसभा मतदारसंघ येतात. या चारही मतदारसंघांत नि:पक्ष निवडणूक व्हावी, यासाठी आयोगांतर्गत मुंबई उपनगर जिल्हा निवडणूक कार्यालयाने विशेष पथकांची नेमणूक केली आहे. या पथकांनी २४ तास देखरेख सुरू केली असून त्याअंतर्गत वरील कारवाई करण्यात आली आहे.
मुंबई उपनगरचे जिल्हाधिकारी व जिल्हा निवडणूक अधिकारी राजेंद्र क्षीरसागर यांनी पत्रकार परिषदेत याबाबत माहिती दिली. ‘निवडणुकीदरम्यान मतदारांना प्रलोभने दाखवण्यासाठीची रोकड, अवैध दारू यांवर २८२ पथकांकडून करडी नजर ठेवली जात आहे. त्यामध्ये १३४ भरारी पथके व १४८ बैठ्या पथकांचा समावेश आहे. ही पथके प्रमुख नाक्यांवर तैनात आहेत. या पथकांनी आतापर्यंत विनापरवाना वाहतूक होणारी ९९ लाख ६५ हजार रुपये मूल्याची ५६ हजार ३८६ लिटर दारू जप्त केली आहे. एकूण २९७ कारवायांमध्ये ही जप्ती झाली आहे. या पथकांनी एक कोटी ५० लाख ४२ हजार रुपयांची अवैध रोख रक्कमदेखील पकडली आहे.
अन्य विभागांकडून १७.९३ कोटींची रोकड
निवडणूक आयोगाच्या विशेष पथकांखेरीज सीमा शुल्क, महसूल गुप्तचर संचालनालय (डीआरआय), उत्पादन शुल्क, प्राप्तिकर विभाग, पोलिस अशा जवळपास २२ विभागांची विशेष पथकेदेखील २४ तास तपास मोहिमेत सहभागी झाली आहेत. यापैकी डीआरआय व सीमा शुल्क विभागाने मुंबई उपनगर जिल्ह्यात एकूण १७.९३ कोटी रुपयांची रोख रक्कम जप्त केली आहे. या रोखीची १० लाख रुपये मर्यादा नियमानुसार तपासणी सुरू आहे.