‘होय मी अस्वस्थ पण…’ मोदींच्या टीकेला पवारांचे उत्तर
काही वर्षांपूर्वी शरद पवार यांचे बोट धरून मी राजकारणात आलो, असे पंतप्रधान नरेंद्र मोदी यांनी जाहीर भाषणातून सांगितले होते. काल त्यांनी सांगितलं राज्यात एक अंतर आत्मा अस्वस्थ आहे, तो आत्मा गेली ४५ वर्षे महाराष्ट्र आणि इथल्या राज्य सरकारला अस्थिर करण्याचा प्रयत्न करतोय. आत्मा अस्वस्थ आहे हे खरंय, पण तो स्वत:च्या स्वार्थासाठी नाही. शेतकऱ्यांची दु:ख पाहून आत्मा अस्वस्थ होत असेल तर त्यामध्ये काही गैर नाही. सध्या संबंध देशातील लोक महागाईने त्रस्त आहेत. त्यांना प्रपंच करणे अवघड झाले आहे. त्यासाठी मी १०० वेळा अस्वस्थ होईन, असे प्रत्युत्तर शरद पवार यांनी मोदींना दिले.
मोदींकडून नाव न घेता शरद पवारांचा ‘भटकता आत्मा’ उल्लेख, महाराष्ट्रात टीकेचे पडसाद उमटण्याची शक्यता
सर्वसामान्यांच्या हिताची भूमिका मांडा, आमच्यावर यशवंतरावाचे संस्कार
सर्वसामान्यांच्या हिताची भूमिका मांडण्यासाठी आणि त्यांचे प्रश्न सोडवण्यासाठी काम केले पाहिजे, ही शिकवण आम्हाला यशवंतराव चव्हाण यांनी दिली आहे, तसे संस्कार त्यांनी आमच्यावर केले आहेत. या संस्कारांशी मी कधीही तडजोड करणार नाही, असेही पवार म्हणाले.
भाजपने आमचं घर फोडलं, पक्ष फोडला
मोदी म्हणतात की, मी अस्वस्थ असतो. होय, मी लोकांचं दु:ख पाहून तडफडतो. मला कितीही किंमत मोजावी लागली तरी चालेल पण मी लाचार होणार नाही आणि महाराष्ट्रही लाचार होणार नाही. भाजपने आमचं घर फोडलं, पक्ष फोडला, अनेक वर्षे काम करण्याची संधी दिलेल्या लोकांना फोडले. हे फोडाफोडीचे राजकारण महाराष्ट्राच्या हिताचे नाही, अशा शब्दात शरद पवार यांनी मोदींच्या टीकेची सव्याज परतफेड केली.