आता पुन्हा एकदा बारामतीला तीन खासदार मिळाले आहेत. पण सगळ्यात महत्त्वाची गोष्ट अशी की, तीनही खासदार बारामतीचे सुपुत्र आणि बारामतीतच काम करणारे मिळालेले आहेत. दुसरी महत्वाची गोष्ट म्हणजे आज बारामतीत तीनही खासदार एकाच वेळी लोकांच्या भेटीगाठी घेत आहेत. शरद पवार गेले तीन दिवस बारामतीच्या दौऱ्यावर आहेत. त्यांनी बारामती तालुक्यातील विविध गावांमध्ये जाहीर सभा देखील घेतल्या.
नवनिर्वाचित राज्यसभा खासदार सुनेत्रा पवार पहिल्यांदाच बारामतीत
आज सुप्रिया सुळे या बारामतीत दाखल झाल्या असून, त्यांनी सकाळीच रोटरी क्लबच्या वतीने वितरित करण्यात येणाऱ्या ई लर्निंग संच आणि इतर साहित्याचे वितरण देखील केले. त्याचबरोबर बारामती लोकसभा मतदारसंघातील कार्यकर्ते व पदाधिकाऱ्यांशी संवाद साधला, तर दुसरीकडे आज सहयोग निवासस्थानी नवनिर्वाचित राज्यसभा खासदार सुनेत्रा पवार यांनी कार्यकर्ते पदाधिकाऱ्यांशी संवाद साधत नागरिकांचा जनता दरबार घेत आहेत.
श्रेयवादात अडकले नाहीत तर बारामतीकरांचा फायदाच
यावेळी त्यांनी नागरिकांच्या समस्या जाणून घेतल्या व त्यांच्या अडीअडचणी जाणून घेत त्यावर उपाययोजना करण्यासाठी आश्वासन देखील दिले. एकूणच आजचा दिवस बारामतीसाठी तीन खासदारांचा ठरला. आता हे तीनही खासदार जर श्रेयवादाची लढाई लढले नाहीत, फक्त नागरिकांच्या अडचणीवर उपाययोजना शोधत राहिले, तर बारामतीकरांचा फायदा होईल, मात्र जर श्रेयवादात या तिघांची तिघाडी अडकली, तर मात्र बारामतीकरांची पुन्हा एकदा निवडणुकीत झाली तशाच स्वरूपाची कोंडी होण्याची शक्यता देखील आहे.