लोकसभेत महाविकास आघाडीत काही जागांवरुन वाद झाल्याचे पाहायला मिळाले आणि काही ठिकाणी ठाकरे गटाला जागावाटपाच्या काही चुकींच्या निर्णयामुळे फटका बसल्याचे सुद्धा चित्र दिसते. अशातच आता विधानसभेत चुकीची पुनरावृत्ती होवू नये म्हणून लोकसभा निकालाच्या आठ दिवसानंतरच ठाकरेंनी विधानसभेची चाचपणी सुरु केली आहे. काँग्रेस आणि राष्ट्रवादी तसेच सेनेचे काही ठरलेले मतदारसंघ आहेत. आता लोकसभेप्रमाणे यंदा गोंधळ होवू नये यासाठी ठाकरेंनी आधीच सावध पावले उचलायला सुरुवात केली असे दिसत आहे.
सगळ्याच राजकीय पक्षाने आता लोकसभेचा निकालावरुन विधानसभेसाठी आखणी सुरु केली आहे. उद्धव ठाकरेंनी सुद्धा तब्बल आठ दिवसात विधानसभेसाठी राज्यातील २८८ विधानसभा मतदारसंघातील संपर्कप्रमुखांची बैठक बोलावली आहे. बैठकी दरम्यान ठाकरेंनी विभागनिहाय सगळ्याच मतदारसंघातील आढावा घेतल्याचे समजते. सेनेच्या संपर्क प्रमुखांना ठाकरेंनी संघाटनात्मक बांधणी वर भर देण्याचा आदेश दिला आहे. लोकसभेच्या निकाल आणि मागील विधानसभेत मिळालेला मताधिक्यावर सुद्धा लक्ष ठेवा असे ठाकरे म्हणालेत.
राज्यात २८८ जागांवर महायुती विरुद्ध महाविकास आघाडी असाच रंगत सामना पाहायला मिळणार आहे. पण त्यात प्रमुख चेहरा म्हणून ठाकरे आणि पवार पॅटर्न चालण्याची लोकसभेप्रमाणे शक्यता आहे. याच अनुषंगाने ठाकरेंनी आता विधानसभेची तयारी सुरु केली आहे. सेना भवन इथे झालेल्या बैठकीत साधारण २५० हून अधिक संपर्कप्रमुखांनी उपस्थिती लावली होती. सगळ्याच संपर्कंप्रमुखांना ठाकरेंनी सात दिवसांच्या आत मतदारसंघाचा अहवाल सादर करण्याची जबाबदारी ठाकरेंनी दिली आहे.