आंबेगाव तालुक्यातील कळंब आणि लौकी या गावांच्या हद्दीवर असलेल्या तुंबे मळ्यात हा प्रकार घडला आहे. लक्ष्मीबाई खंडू थोरात असं सत्तर वर्षांच्या आजीचं नाव आहे. आजीबाईंनी बिबट्याला हुसकावून लावलं असलं तरी शेतकऱ्यांमध्ये भीतीचं वातावरण निर्माण झालं आहे.
नेमकं काय घडलं?
रात्रीच्या वेळी आजी नेहमीप्रमाणे घराचा दरवाजा उघडा ठेवून टीव्ही पाहत बसल्या होत्या. आठ वाजत आले होते. टीव्ही पाहत असतानाच अचानक दारातून बिबट्या घरात शिरला आणि आजी समोर येऊन उभा राहिला.
आजींचा आरडाओरडा
क्षणभर आजीही स्तब्ध राहिल्या. मात्र त्यानंतर त्यांनी घाबरून न जाता क्षणाचाही विलंब न लावता मोठ्याने आरडाओरडा करण्यास सुरुवात केली. या मोठ्या आवाजाने बिबट्या घरातून बाहेर गेला. यावेळी परिसरातील नागरिकांनी आजींच्या घराकडे धाव घेतली. आजूबाजूला बॅटरीचा प्रकाश दाखवत बिबट्याची पाहणी केली. यावेळी बिबट्या शेजारी असलेल्या ऊसाच्या शेतात गेल्याचे पाहायला मिळाले.
Pune Saras Baug : पुण्यातील सारस बागेत गणपती बाप्पासमोर गर्दी जमवून आरती, तरुणावर गुन्हा
आजींच्या धाडसाचं कौतुक
आजीने आरडाओरडा केला नसता, तर बिबट्याने आजींवर हल्ला केला असता, अशी भीती व्यक्त केली जात आहे. आजीने दाखवलेल्या धाडसाचे सर्वत्र कौतुक होत आहे. सत्तर वर्ष वय असलेल्या आजीने घरात आलेल्या बिबट्याला कसे धाडसाने परतवून लावले, या घटनेची चर्चा परिसरामध्ये होऊ लागली आहे.
खेड जुन्नर आंबेगाव शिरूर या तालुक्यांमध्ये बिबट्याचा वावर मोठ्या प्रमाणावर आहे. बिबट्या मानवी वस्तीत दिसायला लागल्याने नागरिकांना जीव मुठीत धरून चालावे लागत आहे. यावर वन विभागाने उपाययोजना करण्याची गरज निर्माण झाली आहे. बिबट्या घरात शिरू लागल्याने नागरिकांमध्ये भीतीचे वातावरण निर्माण झाले आहे.