पुणे : पुण्यातील मावळ तालुक्यातून एक धक्कादायक घटना समोर आली आहे. अंदर मावळ येथे एका तरुणाचा वार करून खून केल्याचे समोर आले आहे. शाब्दिक बाचाबाचीतून हा प्रकार घडल्याचे समोर आले आहे. या घटनेनं परिसरात एकच खळबळ उडाली आहे. अक्षय जगताप असे मृत तरुणाचे नाव असून या प्रकरणी वडगाव मावळ पोलीस स्टेशनमध्ये नऊ जणांविरोधात गुन्हा दखल करण्यात आला आहे. कुसुर गावाच्या हद्दीतील टाकवे-खांडी रोडवरील कामा फार्मा येथे ही घटना घडली आहे.पोलिसांनी दिलेल्या माहितीनुसार, बुधवारी रात्री मृत अक्षय जगताप आणि अशोक तुरडे याचा भाऊ असलेला अंकुश तुरडे यांच्यामध्ये जमिनीवरून वाद झाला होता. त्यांच्यावरून त्यांच्यात शाब्दिक बाचाबाची झाली. त्यानंतर त्यांच्यात हाणामारी झाली. यात अक्षय याने रागात अंकुश याच्या नाकावर बुक्का मारला. त्यात अंकुशला जखम झाली. त्याचा राग अंकुशच्या मनात होता. त्यानंतर अशोक तुरडे याने त्याच्या साथीदाराच्या मदतीने अक्षय याला लोखंडी कोयता, रॉड, लाकडी दांडके, लोखंडी सळया घेऊन बेदम मारहाण केली. या मारहाणीत अक्षय गंभीर जखमी झाला आणि त्यातच त्याचा मृत्यू झाला. त्याच्यासोबत असलेला एक तरुण देखील जखमी झाला आहे. घटनेची माहिती मिळताच पोलिसांनी घटनास्थळी धाव घेतली.
आरोपीचा शोध घेण्यासाठी पोलिसांनी पथके रवाना केली आहे. मावळ तालुक्यात पोलिसांनी बंदोबस्त ठेवला होता. या घटनेनं मावळ तालुक्यात तणावाचे वातावरण निर्माण झाले आहे. पोलिसांकडून प्रत्येक घडामोडीवर लक्ष ठेवले जात असून आरोपीचा लवकरच शोध घेतला जाईल असे पोलिसाकडून सांगण्यात आले आहे.