अगस्त्यने अनिवार्य इंग्रजीसोबत भौतिकशास्त्र, रसायनशास्त्र, जीवशास्त्र आणि गणित हे विषय घेऊन दहावीची परीक्षा दिली असून यात तो अ श्रेणीमध्ये उत्तीर्ण झाला आहे. अगस्त्यने लहान वयात दहावीची परीक्षा दिल्याबद्दल त्याचे नाव इंडिया बुक ऑफ रेकॉर्डसमध्येही नोंदले गेले आहे. अगस्त्यचा शिक्षणप्रवास पाहून इतर अनेक पालक गृहशिक्षणाबद्दल चौकशी करत असल्याचे जोशी यांनी सांगितले.
गृहशिक्षणावर विश्वास ठेवणाऱ्या पालकांची संख्या वाढत असल्याचेही त्या म्हणाल्या. गृहशिक्षण करताना दहावीची परीक्षेच्या दृष्टीने तयारी करण्यासाठी विशेष मार्गदर्शनही घेतले. करोना काळातील ऑनलाइन शिक्षणाने पालकांनी या शिक्षणपद्धतीकडे अधिक वेगळ्या दृष्टीकोनातून पाहायला सुरुवात केल्याचेही दिसत आहे.
ठाण्यातील अक्षज मालशे या विद्यार्थ्यानेही यंदा दहावीची परीक्षा दिली आहे. गेली चार वर्षे गृहशिक्षणाच्या माध्यमातून त्याला शिकवण्यात येत असून दहावीची परीक्षा एनआयओएस बोर्डाच्या माध्यमातून दिली आहे. त्याला गणित आवडायचे, प्रयोगातून शिकलेले विज्ञानही आवडायचे. त्यामुळे त्याचा कल पाहून, वर्षभर गृहशिक्षणाचा प्रयोग करणाऱ्या पालकांशी बोलून मग शिक्षणाच्या ठराविक चौकटीबाहेर पडण्याचा निर्णय घेतल्याचे त्याची आई डॉ. मानसी मालशे यांनी सांगितले.
एनआयओएस बोर्डाच्या माध्यमातून परीक्षा देताना विषय वैविध्य उपलब्ध झाले होते. कमीत कमी पाच आणि जास्तीत जास्त सात विषय घेऊन विद्यार्थ्यांना ही परीक्षा देता येते. यामध्ये अक्षजने इंग्रजी, गणित, विज्ञान यासोबतच चित्रकला आणि मानसशास्त्र हे विषय निवडले होते. यामुळे त्याला इतर वेळी दहावीच्या अभ्यासक्रमात समाविष्ट नसलेल्या विषयांचीही तोंडओळख झाली. याचा फायदा त्याला पुढच्या शिक्षणाचा मार्ग निवडताना नक्की होईल, असा विश्वास त्याच्या पालकांनी व्यक्त केला आहे. गृहशिक्षण करताना इतर मदत घ्यायची नाही असे नसते, मात्र शिक्षणाचा हा मार्ग का निवडायचा आहे त्याबद्दल विचारांमध्ये स्पष्टता हवी, असे डॉ. मालशे यांनी आवर्जून सांगितले. ऑनलाइन माध्यमातून शिक्षण घेणाऱ्या विद्यार्थ्यांचेही प्रमाण हळूहळू वाढत असल्याचे निरीक्षण त्यांनी नोंदवले.
SSC Result 2024: पालघरचा निकाल ९६.०७ टक्के; बारावीप्रमाणेच दहावीच्या परीक्षेतही मुलींनी मारली बाजी
‘आत्मविश्वास दुणावला’
ठाण्यातील काव्या राणे या विद्यार्थिनीनेही यंदा एनआयओएस बोर्डाच्या माध्यमातून दहावीची परीक्षा दिली आहे. करोना काळात ऑनलाइन पद्धतीने झालेल्या शिक्षणानंतर गृहशिक्षणाचा पर्याय स्वीकारल्याचे काव्याची आई अस्मिता राणे यांनी सांगितले. सहावीपर्यंत काव्या शाळेत जात होती. या काळात तिच्या पालकांनी गृहशिक्षणाबद्दल ऐकले होते मात्र या पर्यायाबद्दल साशंकता होती. करोना काळाने गृहशिक्षणाचा आत्मविश्वास दुणावल्याचे तिच्या पालकांनी सांगितले. आपल्या पाल्याने केवळ परीक्षार्थी बनू नये या दृष्टीने गृहशिक्षणाचा निर्णय अधिक योग्य वाटत असल्याचेही ते म्हणाले. करोनानंतर पालक गृहशिक्षण, नो स्कूलिंग, ऑनलाइन शिक्षण अशा अनेक पर्यांयाचा अधिक खुलेपणाने विचार करत असल्याचे दिसत आहे, असेही हे पालक सांगत आहेत.