भाजप आमदार गणपत गायकवाड यांना पोलीस स्टेशनमध्ये गोळीबार केल्याप्रकरणी तळोजा जेलमध्ये ठेवण्यात आले आहे. मात्र आज विधान परिषदेच्या ११ जागांसाठी निवडणूक होत असल्याने न्यायालयाच्या आदेशानुसार त्यांना मतदानाचा हक्क बजावण्यासाठी कडक पोलिस बंदोबस्तामध्ये मुंबईच्या दिशेने रवाना करण्यात आले. आमदार गणपत गायकवाड हे विधान परिषद निवडणुकीत मतदानाचा हक्क बजावणार असल्याने राजकीय वर्तुळात खळबळ उडाली आहे.
लोकप्रतिनिधी कायद्यामधील तरतुदीनुसार आमदार गणपत गायकवाड विधान परिषद निवडणुकीत मतदान करु शकत नाहीत. त्यामुळे त्यांना मतदान करण्याची परवानगी देऊ नये, अशी काँग्रेसची मागणी आहे.
काँग्रेसच्या पत्रात काय?
विधानसभा सदस्य श्री. गणपत गायकवाड हे सध्या न्यायालयीन कोठडीत आहेत. The representation of the people Act 1951 सेक्शन 62 (5) नुसार ते मतदानाचा हक्क बजावू शकत नाहीत. विधान सभा सदस्य श्री. गणपत गायकवाड हे मतदान करणार असल्याचे समजते. कृपया त्यांना अवैध मतदान करण्यापासून रोखावे आणि The representation of the people Act.1951 सेक्शन 62 (5) नुसार कोणत्याही दबावात न येता संविधानिक मूल्यांचे रक्षण करावे अन्यथा आपण श्री. गणपत गायकवाड यांना मतदान करु दिल्यास आम्हाला कायदेशीर बाबींचा अवलंब करावा लागेल, असे पत्र काँग्रेसच्या विधानपरिषद उमेदवार प्रज्ञा राजीव सातव यांचे उमेदवार प्रतिनिधी अभिजित गोविंदराव वंजारी यांनी लिहिले आहे.
Sushma Andhare : विधान परिषदेत अजितदादांचा उमेदवार पडणार? सुषमा अंधारेंनी थेट नावच सांगितलं
दरम्यान, निवडणूक आयोग पक्षपाती असून भाजपच्या तालावर चालत असल्याचा आरोप विधानपरिषदेचे विरोधीपक्ष नेते अंबादास दानवे यांनी केला आहे. अनिल देशमुख हे तुरुंगात असताना त्यांच्यावर केवळ आरोप होते, तरीही त्यांना मतदानाचा हक्क नाकारण्यात आला होता. मात्र गणपत गायकवाडांनी पोलीस स्थानकात गोळीबार केल्याचे पुरावे असतानाही त्यांना परवानगी देणे चुकीचे असल्याचे दानवे म्हणाले.