महायुतीत सध्या नेत्यांची भाऊगर्दी झाली आहे. तर महाविकास आघाडीत नेत्यांची वानवा आहे. अशा परिस्थितीत वसंत मोरेंनी हाती शिवबंधन बांधलं आहे. पण सलग तीन टर्म नगरसेवक राहिलेल्या आणि लोकसभेला दारुण पराभव पत्करावा लागलेल्या मोरेंना विधानसभेचं तिकीट मिळण्याची शक्यता अतिशय कमी आहे. त्यामुळे त्यांना महापालिकेत जबाबदारी मिळू शकते. तिथल्या कामाचा त्यांना दांडगा अनुभव आहे. उद्धव ठाकरेंनी मोरेंच्या प्रवेशावेळी तसे सूतोवाच केले आहेत.
वसंत मोरेंनी २०१९ मध्ये मनसेकडून विधानसभा निवडणूक लढवली. ते हडपसरमधून उभे राहिले होते. त्यांना तिसऱ्या क्रमाकांवर राहावं लागलं. मोरेंना ३४ हजार ८०९ मतं मिळाली होती. इथून राष्ट्रवादीचे चेतन तुपे विजयी झाले. राष्ट्रवादीत फूट पडल्यानंतर चेतन तुपे अजित पवारांकडे गेले. महाविकास आघाडीत ही जागा शरद पवारांच्या राष्ट्रवादीकडे असेल असं मानलं जातं. शरद पवार गटाचे पुणे शहराध्यक्ष प्रशांत जगताप यांची हडपसरमध्ये ताकद आहे. पवारांच्या पडत्या काळात जगताप त्यांच्या सोबत उभे राहिले. त्यामुळे जागावाटपात शरद पवार ही जागा सोडणार नाहीत.
वसंत मोरेंची खडकवासला विधानसभा मतदारसंघातही ताकद आहे. पण इथेही शरद पवारांचाच दावा असेल. पवारांकडे सचिन दोडकेंच्या रुपात अतिशय तगडा उमेदवार आहे. २०१९ मध्ये दोडके अवघ्या अडीच हजार मतांनी पराभूत झाले आहे. शिवाय लोकसभेला सुप्रिया सुळेंना या मतदारसंघातून चांगलं मतदान झालं. २०१९ मध्ये सुळे इथून ६५ हजार मतांनी मागे पडल्या होत्या. यातील ४० हजारांचं लीड सुळेंनी यंदा कापून काढलं. त्यामुळे खडकवासल्याची जागा पवार सोडणार नाहीत.
Vasant More : वसंत मोरेंचा ठाकरे गटात प्रवेश, पण उद्धव ठाकरेंनी ‘त्या’ विषयावर बोलणे टाळले
विधानसभेचा पर्याय नसल्यानं वसंत मोरेंसमोर पुणे महापालिकेचा पर्याय उरतो. गेल्या दोन दशकांमध्ये महापालिकेत सेनेची पिछेहाट झाली. २००७ मध्ये पालिकेत सेनेचे २५ उमेदवार निवडून गेले. २०१२ मध्ये हाच आकडा १७ वर आला. २०१६ मध्ये तो १० पर्यंत घसरला. मोरेंच्या रुपात पुण्यात ठाकरेसेनेला चेहरा मिळू शकतो. पण त्यासाठी त्यांना पक्षबांधणी करावी लागली. संघटनेत जान फुंकावी लागली.
दलित, मुस्लिम हा वसंत मोरेंचा प्रमुख मतदार मानला जातो. पण लोकसभा निवडणुकीत मोरेंना मिळालेली मतं पाहता हा मतदार त्यांच्यापासून दूर गेला आहे. हा मतदार सोबत जोडण्याचं आव्हान मोरेंसमोर असेल. शहरी भागात त्यांच्यासमोर भाजपचं आव्हान असेल. याशिवाय महाविकास आघाडीत असलेल्या शरद पवारांच्या आक्रमक राजकारणाचा सामनाही त्यांना करावा लागेल
.
मनसे, वंचितमधून बाहेर पडताना मोरेंनी अंतर्गत राजकारणाचं कारण दिलं. आता त्यांना ठाकरेसेनेतही तसाच अनुभव येऊ शकतो. संजय मोरे, गजानन थरकुडे ठाकरेसेनेचे शहरप्रमुख आहेत. दोन शहरप्रमुख असल्यानं मोरेंना या पदी संधी मिळण्याची शक्यता कमी आहे. मिळाल्यास पक्षात चुकीचा संदेश जाईल. संजय मोरे, गजानन थरकुडे यांनी पक्षात फूट पडल्यानंतही ठाकरेंची साथ सोडली नाही. त्यामुळे त्यांना डावलून मोरेंना संधी दिल्यास पक्षात नाराजी निर्माण होऊ शकते. त्यामुळे मोरे यांना सोबत घेऊन ठाकरे नेमकं काय आणि कसं साधणार याकडे लक्ष लागलं आहे.