सांगली शहरातील अनेक ठिकाणी, कॉलेज समोर कॅफेच्या नावाखाली अश्लील कृत्य करण्याचे प्रकार वाढले आहेत. या कॅफे मध्ये प्रायव्हेट रूम केलेले असतात ते कशासाठी? याबाबत वारंवार तक्रार करून देखील कारवाई होत नाही. सांगलीतील हँग ऑफ कॅफेमध्ये कॉफीतून गुंगीचे औषध देऊन अल्पवयीन युवतीशी लैंगिक अत्याचार केल्याचा प्रकार घडला. पीडित युवतीने विश्रामबाग पोलिस ठाण्यात फिर्याद दिल्यानंतर संशयित आशिष शरद चव्हाण याच्याविरुद्ध बलात्कार आणि ‘पोक्सो’अंतर्गत गुन्हा दाखल झाला आहे. त्याला अटक करण्यात आली आहे.
दरम्यान, शिवप्रतिष्ठान युवा हिंदुस्थान संघटनेने दोन वर्षापूर्वी सांगलीतील कॅफेमध्ये लैंगिक चाळे सुरु असल्याची तक्रार करत सर्व कॅफे बंद करण्याचा इशारा दिला होता. थोडे दिवस प्रकार शांत राहिला. त्यानंतर राजरोसपणे कॅफेमध्ये लैंगिक चाळे करण्यासाठी मूभा दिली जात आहे. सहा महिन्यात याबाबत दोन गुन्हे दाखल झाले आहेत.
या प्रकारामुळे शिवप्रतिष्ठान युवा हिंदुस्थानच्या संतप्त कार्यकर्त्यांनी आज विश्रांबाग परिसरतील १०० फूटी रोडवर असणार्‍या हॅंग ऑफ कॅफेवर हल्लाबोल केला. कॅफेतील केबिनची तोडफोड केली. आतील फर्निचर, खुर्च्यांची तोडफोड केली. फलकावर दगडफेक करुन तो फाडला. जोरदार घोषणाबाजी केली. त्याच बरोबर याच परिसरात असणाऱ्या आणखी दोन कॅफेंना लक्ष करत उद्ध्वस्त केले.
विश्रामबाग पोलिसांना माहिती मिळताच त्यांनी तत्काळघटनास्थळी धाव घेतली. हे कॅफे बंद करण्यासाठी पोलिस अधिकार्‍यांना निवेदन दिले आहे. परंतु पोलीस हप्ते घेऊन कारवाई करत नाहीत. त्यामुळे आम्हाला आंदोलन करावे लागले. यापुढेही कॅफेत गैरप्रकार सुरु राहिल्यास तोडफोड करावी लागेल. सांगलीतील या प्रकरणात कॅफे मालकावर गुन्हा दाखल करुन सहआरोपी करावे अशी मागणी यावेळी शिवप्रतिष्ठान युवा हिंदुस्तानकडून करण्यात आली. दरम्यान, या प्रकरणी १६ जणांना ताब्यात घेतले असून पुढील कारवाई सुरू असल्याचे अपर पोलीस अधीक्षक रितू खोकर यांनी सांगितले.