दृष्टीदोषावर मात करत यश
माटुंग्यातील रुईया कॉलेजच्या विज्ञान शाखेत शिकणाऱ्या भक्ती गावडे हिला बारावीच्या परीक्षेत ८१.६६ टक्के मिळाले आहेत. भक्तीला लहानपणापासूनच लांबचे फार कमी दिसायचे. परंतु ही अडचण असूनही तिने विज्ञान शाखेतून चांगले टक्के मिळवत हे यश मिळवले आहे. आई-वडील आणि शिक्षकांमुळे हे यश मिळाले असे ती सांगते. ‘हा निकाल माझ्या कायम स्मरणात राहणार आहे. मी वर्षभर या क्षणासाठी खूप मेहनत केली होती. बारावीत चांगले टक्के मिळावेत अशी सगळ्यांची इच्छा असते, त्याप्रमाणे माझी ही होती. शिक्षकांच्या प्रोत्साहनामुळे,वेळोवेळी केलेल्या मार्गदर्शनामुळे आणि आई-बाबांच्या कष्टामुळे मी आज हे यश संपादन करू शकले. मला कम्प्युटर सायन्स या विषयात इंजिनिअरिंग करायचे होते. म्हणूनच मी कम्प्युटर सायन्स ही शाखा निवडली,’ असे भक्तीने सांगितले.
‘वर्गात भक्तीला काही न समजल्यास शिक्षक तिला नंतर समजावून सांगत असत. त्यामुळे तिच्या यशात शिक्षकांचाही वाटा आहे. भविष्यात तिने खूप मोठे व्हावे आणि स्वतःच्या पायावर उभे राहावे अशी आमची इच्छा आहे.’ असे भक्तीच्या वडिलांनी सांगितले.
अर्धांगवायूवर मात करून श्रेयाची बाजी
मुलुंडच्या वझे केळकर कॉलेजच्या कला विभागात शिकणारी श्रेया सुर्वे हिला लहानपणापासूनच अर्धांगवायूचा त्रास आहे. या प्रतिकूल परिस्थितीवर मात करत श्रेयाने चांगला अभ्यास करून यंदा बारावीच्या परीक्षेत ४८ टक्के मिळवत सर्वांनाच सुखद आश्चर्याचा धक्काद दिला. आता बारावीच्या निकालानंतर श्रेया स्पर्धा परीक्षांचा अभ्यास करणार आहे. यापुढेही स्वकर्तृत्वाने तिला आई-वडिलांचे नाव उज्ज्वल करायचे आहे. ‘मला प्रवासात आईवडील आणि कॉलेजच्या शिक्षकांनी खूप आत्मविश्वास दिला. कॉलेजच्या सुरुवातीच्या दिवसांत आई किंवा बाबा मला सोडायला आणि आणायला यायचे, परंतु हळूहळू मी प्रवास करायला शिकले. त्याचसोबत, माझ्या कॉलेजच्या मित्र-मैत्रिणींनी मला नोट्स देण्यापासून ते मला कधी त्रास झाला तरीही सोबत राहून मोलाची साथ दिली. परीक्षेच्या काळात मी सकाळी लवकर उठून अभ्यास केला आणि खूप वाचन केले. कदाचित त्याचेच हे श्रेय असावे,’ असे श्रेयाने सांगितले.
‘श्रेया नऊ महिन्यांची असताना पायऱ्यांवरून पडल्यामुळे तिला अर्धांगवायूचा त्रास सुरू झाला. हा त्रास असूनही तिने दहावी व बारावीत चांगले गुण मिळवलेसुद्धा तिने इतके चांगले टक्के मिळवून जे यश संपादन केले आहे. हे पाहून खरंच खूप आनंद वाटतोय, से श्रेयाचे वडील शशिकांत सुर्वे यांनी सांगितले.
अपंगत्वावर मात करत यशाला गवसणी
रुईया कॉलेजची विद्यार्थिनी असणाऱ्या जान्हवी कारंडे हिने अपंगत्वावर मात करून माटुंग्याच्या बारावीच्या परीक्षेत कला विभागातून ९०.८२ टक्के मिळवत घवघवीत यश संपादन केले आहे. जान्हवीला सेरेब्रल पाल्सी ही व्याधी आहे. आजारामुळे जान्हवी दोन्ही पायांनी अपंग आहे. तिला चालताना प्रचंड त्रास होतो. हा त्रास असूनही घर ते कॉलेजपर्यंतचा प्रवास ती रोज करत असे. तिने कोणत्याही कोचिंग क्लासशिवाय हे यश मिळवले. जान्हवीला फ्रेंच या विषयात पदवी घ्यायची आहे. ‘कॉलेजमधील प्राध्यापकांनी मला खूप मदत केली. पाऊस खूप असेल त्यावेळेस किंवा इतरही काही त्रास होत असेल, तर मला माझे कॉलेजचे मित्र आणि प्राध्यापक दुसऱ्या दिवशी मला नोट्स देऊन मदत करत. या यशाचे सर्व श्रेय माझ्या आईबाबांना आहे,’ असे जान्हवी म्हणाली.
‘आम्हाला आमच्या मुलीचा खूप अभिमान वाटतो. ती लहानपणापासूनच हुशार होती. बारावीच्या परीक्षेत ती चांगले गुण मिळवेल याची आम्हाला खात्री होती. तिने आवडीच्या क्षेत्रात कारकीर्द करावी व माणूस म्हणूनही चांगले व्हावे,’ असे जान्हवीची आई म्हणाली.
Maharashtra HSC Result 2024 : मोबाईल-सोशल मीडियाला काट, नागपुरातील बारावीच्या टॉपर्सच्या यशाचा कानमंत्र
अंधत्वावर मात करत चांगले गुण
वझे केळकर कॉलेजचा विद्यार्थी असणाऱ्या रोहित नेवरेकर याने बारावीच्या परीक्षेत ८०.८३ टक्के गुण मिळवले आहेत. रोहितला जन्मापासूनच अंधत्वाचा त्रास आहे. त्याचा डावा डोळा पूर्ण निकामी आहे, तर उजव्या डोळ्याने त्याला फक्त २५ टक्के दिसते. परंतु त्याने वर्षभर जोमाने अभ्यास केला. अभ्यास करताना त्याला प्रचंड त्रासाला सामोरे जावे लागले. पाहू शकत नसल्यामुळे त्याला ऑडिओ बुक्सचा वापर करावा लागला. यूट्युबवर वेगवेगळ्या विषयांवरील ऑडिओ ऐकून त्याने त्याचा बारावीचा अभ्यास केला. ‘उजव्या डोळ्याने फक्त २५ टक्के दिसत असल्यामुळे मला लेक्चरला गेल्यानंतर विषय समजून घेण्याकरिता फार वेळ लागायचा. परंतु माझे शिक्षक आणि मित्र-मैत्रिणी मला त्या विषयांचे नंतर ऑडिओ पाठवायचे. राज्यशास्त्र हा माझा सर्वांत आवडता विषय होता. परीक्षा जवळ येत गेल्यानंतर मी माझ्या अभ्यासाचे प्रमाण वाढवले,’ असे रोहितने सांगितले.
‘रोहितच्या यशामुळे आम्हाला सर्वांनाच आनंद झाला आहे. आमच्या कष्टांची त्याला जाणीव असून त्याने परिश्रमपूर्वक हे यश मिळवले,’ अशी प्रतिक्रिया रोहितच्या आईने दिली.
(संकलन- साक्षी पाटील, रुईया कॉलेज)