विधान परिषदेच्या रिक्त होणाऱ्या ११ जागांसाठी आज, शुक्रवारी मतदान झाले तसेच तासाभरात मतमोजणी देखील पार पडली. विधानसभेच्या २८८पैकी २७४ सदस्यांनी निवडणुकीत मतदान केले. अंतिम निकालानुसार भाजपचे परिणय फुके, पंकजा मुंडे, अमित गोरखे, सदाभाऊ खोत, योगेश टिळेकर, शिंदे गटाचे कृपाल तुमाने, भावना गवळी आणि अजित पवार यांच्या नेतृत्वाखालील राष्ट्रवादीचे शिवाजीराव गर्जे आणि राजेश विटेकर विजयी झाले.
महायुतीचा विजयी झेंडा, मविआला धक्का!
भारतीय जनता पक्षाचे सर्व आमदार निवडून येतील एवढी मते त्यांच्याकडे होती. शिवसेना शिंदे गट आणि अजित पवार यांना काही मतांची जुळजुळव करावी लागणार होती. लोकसभा निवडणुकीच्या निकालानंतर काही आमदार फुटण्याची शक्यता व्यक्त केली जात होती. परंतु आपले आमदार एकसंध ठेवण्यात एकनाश शिंदे आणि अजित पवार यांना यश मिळाले. विधान परिषद निवडणुकीत शरद पवार हे अजित पवार यांच्याकडील आमदारांची मते खेचून त्यांना धक्का देतील, असे राजकीय वर्तुळात बोलले जात होते. परंतु लोकसभा निवडणुकीतील पराभवापासून धडा घेऊन अजित पवार यांनी निवडणुकीचे परफेक्ट नियोजन केले, त्याचा परिपाक अजित पवार यांचे दोन्ही उमेदवार निवडून येण्यात झाला. दुसरीकडे ठाकरे गटाचे मिलिंद नार्वेकर सर्वपक्षीय संबंधाच्या जोरावर आमदार बनले. काँग्रेस उमेदवार प्रज्ञा सातव यांनीही विजय संपादन केला. मात्र काँग्रेस आमदारांची ७ ते ८ मते फुटल्याची चर्चा आहे. मागील निवडणुकीत देखील काँग्रेसची काही मते फुटली होती.
राज्यातले ‘रिसॉर्ट पॉलिटिक्स’ जोमात!
दोन वर्षांपूर्वी झालेल्या विधान परिषद निवडणुकीत काँग्रेसची मते फुटली होती. यावेळी सर्वच पक्षांना मतफुटीचा धोका संभवत होता. त्यामुळे भाजपने आपल्या आमदारांना मुंबईतील कुलाब्यातील प्रेसिडेंट हॉटेलमध्ये ठेवले आहे. शिवसेना ठाकरे गटाने आपल्या आमदारांना परळच्या आयटीसी हॉटेलमध्ये ठेवले होते. तर राष्ट्रवादी काँग्रेस अजित पवार गटाचे आमदार सांताक्रुजमधील ललित हॉटेलमध्ये मुक्कामी होते. शिवसेना शिंदे गटाचे सर्व आमदार हॉटेल ताज लँड एंड्समध्ये मुक्कामी होते. राजकीय पक्षांनी आपले आमदार विरोधकांच्या गळाला लागू नये, यासाठी पुरेपूर बंदोबस्त केला होता.