आधी बारामतीत ठाण मांडून बसलेल्या अजित पवारांनी नंतर शिरुरमध्ये विशेष लक्ष घातलं. धाराशिवची जागाही राष्ट्रवादीकडे आहे. भाजपमधून राष्ट्रवादीत आलेल्या अर्चना पाटील यांना राष्ट्रवादीनं उमेदवारी दिली आहे. पण अजित पवारांनी धाराशिवमध्ये फारसं लक्ष घातलं नाही. पंतप्रधान मोदी काल महाराष्ट्र दौऱ्यावर होते. त्यांनी दिंडोरी, कल्याणमध्ये सभांना संबोधित केलं. पण या दोन्ही सभांना अजित पवार अनुपस्थित होते.
दिंडोरीत झालेल्या सभेला राष्ट्रवादी काँग्रेस पक्षाकडून मंत्री छगन भुजबळ उपस्थित होते. तर कल्याणमधील प्रचार सभेला प्रदेशाध्यक्ष सुनील तटकरे हजर होते. पण अजित पवार कुठेही दिसले नाहीत. मुंबईतील घाटकोपर परिसरात मोदींनी रोड शो केला. त्यावेळीही अजित पवार हजर नव्हते. मंगळवारी पंतप्रधान मोदींनी वाराणसी मतदारसंघातून उमेदवारी अर्ज भरला. त्यावेळी राष्ट्रीय लोकशाही आघाडीच्या घटक पक्षांचे नेते उपस्थित होते. पण अजित पवार तिकडेही उपस्थित नव्हते.
नाशिक जिल्ह्यात राष्ट्रवादी काँग्रेसची चांगली ताकद आहे. नाशिक लोकसभा मतदारसंघातील सहापैकी तीन आमदार राष्ट्रवादीचे आहेत. मतदारसंघात असलेली ताकद पाहता राष्ट्रवादीनं नाशिकवर दावा केला होता. छगन भुजबळ यांच्या नावाची चर्चा दिल्लीत झाली. केंद्रीय गृहमंत्री अमित शहा त्यांच्या नावाची चर्चा होती. पण विद्यमान खासदार शिवसेनेचा असल्यानं शिंदेंनी ही जागा प्रतिष्ठेची केली. त्यामुळे उत्तम संघटन, कार्यकर्त्यांची फळी असतानाही राष्ट्रवादीला नाशिकवरील दावा सोडावा लागला. याच पार्श्वभूमीवर अजित पवारांची अनुपस्थिती चर्चेचा विषय ठरली.