राष्ट्रीय आखाड्यांमध्ये ठसा
मुळशी तालुक्यातील मुठा हे मोहोळ यांचे मूळ गाव. तेथील जिल्हा परिषदेच्या प्राथमिक शाळेत त्यांनी धडे गिरवले. वडील किसनराव नोकरीसाठी पुण्यात आल्यानंतर मोहोळ भावे हायस्कूलमध्ये दाखल झाले. मोहोळ यांचे वडील बँकेत शिपाई होते. आजोबा दगडोबा, वडील, चुलते रामचंद्र, मोठा भाऊ प्रभाकर हे पैलवान असल्याने हीच परंपरा जपत मुरलीधर यांनी कुस्तीच्या सरावासाठी कोल्हापूर गाठले. तेथूनच कला शाखेची पदवी घेतली. आंतरविद्यापीठ आणि राष्ट्रीय स्तरावराच्या आखाड्यापर्यंतच्या कुस्ती स्पर्धा त्यांनी गाजवल्या. पायाच्या दुखापतीमुळे त्यांना कुस्ती थांबवावी लागली.
सार्वजनिक मंडळांतून समाजकार्य
कोथरूडमधील श्री साई मित्र मंडळाच्या माध्यमातून मोहोळ यांनी सामाजिक कार्याचा श्रीगणेशा केला. राष्ट्रीय स्वयंसेवक संघाच्या शाखेत ते जाऊ लागले आणि १९९३च्या सुमारास भाजपशी जोडले गेले. अनिल शिरोळे यांच्या माध्यमातून दिवंगत नेते गोपीनाथ मुंडे यांचे कट्टर समर्थक अशी त्यांची ओळख बनली. सन २००२ मध्ये महापालिकेच्या निवडणुकीसाठी दावेदारी नाकारल्यानंतर पक्षाने त्यांना शिक्षण मंडळाचे सदस्य केले. काँग्रेसचे सुबराव कदम यांच्या निधनानंतरच्या पोटनिवडणुकीत विजयी होऊन सन २००६ मध्ये मोहोळ प्रथमच नगरसेवक झाले. त्यानंतर सन २००७ मध्ये ते पुन्हा नगरसेवक झाले.
Pune Lok Sabha: लोकसभेचा परिणाम विधानसभेत किती? २०१९ वरुन २०२४चं भाकित, मतदारसंघनिहाय आढावा
निवडणुकीच्या रिंगणात उडी
सन २००९ मध्ये पक्षाच्या आदेशानुसार मोहोळ यांनी खडकवासला मतदारसंघातून विधानसभेची निवडणूक लढवली. पण, त्यात त्यांना यश आले नाही. सन २०१२ मध्ये महापालिकेसाठी त्यांच्याऐवजी पत्नी मोनिका यांना पक्षाने संधी दिली. मुंडे यांच्या आकस्मिक निधनानंतर काळात देवेंद्र फडणवीस यांनी मोहोळ यांना आपल्या छत्रछायेत घेतले. लवकरच फडणवीसांचे अतिशय विश्वासू अशी मोहोळ यांची ओळख निर्माण झाली. सन २०१७ मध्ये मुरलीधर हे पुन्हा नगरसेवक झाले आणि स्थायी समितीचे अध्यक्ष बनले. २०१९ मध्ये तत्कालीन महापौर मुक्ता टिळक आमदार झाल्या आणि मुरलीधर मोहोळ पुण्याचे प्रथम नागरिक बनले.फडणवीसांच्या निकटवर्तीय खासदाराला लॉटरी; मोदी मंत्रिमंडळात होणार एन्ट्री; PMOमधून फोन आला
करोनाकाळात लागली कसोटी
महापौर झाल्यानंतर काही दिवसांतच करोना आला आणि त्यांच्या नेतृत्वाची कसोटी लागली. रस्त्यावर उतरून ‘रेडझोन’मध्ये, रुग्णालयांमध्ये जाऊन काम करणारे मोहोळ याच काळात पुण्याचा चेहरा बनले. महाराष्ट्र केसरी स्पर्धांचे आयोजन करीत मोहोळांनी कुस्तीशी असलेली आपली नाळ कायम ठेवली. या सर्व गोष्टींचा त्यांना लोकसभा निवडणुकीत फायदा झाला. प्रचाराच्या अखेरच्या टप्प्यात चुरशीची मानली गेलेली पुणे लोकसभेची जागा मोहोळ यांनी सव्वा लाखांच्या फरकाने जिंकली. पश्चिम महाराष्ट्रात भाजपच्या सातारा आणि पुणे या दोनच जागा निवडून आल्या. पश्चिम महाराष्ट्रातील मराठा समाजाचे नेते म्हणून भाजपच्या केंद्रीय नेतृत्वाने त्यांना केंद्रीय मंत्रीपदाची संधी दिली आहे.
पक्षावरील विश्वासामुळेच सर्वोच्च संधी
आपल्या सुमारे ३० वर्षांच्या राजकीय कारकिर्दीत वेळोवेळी दाखवलेला संयम मोहोळ यांच्यासाठी लाभदायी ठरला आहे. कारकिर्दीच्या विविध टप्प्यांवर त्यांना काही ठिकाणी तडजोड करावी लागली. आपल्या आकांक्षांना मुरड घालावी लागली. अनेकदा त्यांना त्यासाठी दिलेली आश्वासने पाळलीही गेली नाहीत. पालिका, विधानसभा आदी टप्प्यांवर त्यांना पक्षाने ‘ब्रेक’ घ्यायलाही सांगितला. तरीही मोहोळ यांनी पक्षावरची श्रद्धा ढळली नाही. आणि याच सबुरीचे फळ त्यांना पहिल्याच खासदारकीत केंद्रीय मंत्रिपदाच्या रूपाने मिळाले.